Андижон вилоятида Telegram мессенжерида беҳаё расмларини каналларда тарқатиш билан қўрқитган “куёв бола” аёл киши бўлиб чиқди. Бу ҳақда ИИВ Киберхавфсизлик департаменти хабар берди.
Қайд этилишича, Андижон туманида яшовчи 18 ёшли (аёл) А.Р. ариза билан мурожаат қилиб, “Аброр” исмли номаълум шахс унинг турли фото-суратлари ва беҳаё тасвирлари бўлган видеоларини интернет ижтимоий тармоғи орқали тарқатиб юбориш билан қўрқитиб, тарқатмаслик эвазига пул талаб қилаётганини маълум қилган.
Тезкор-қидирув хизмати Киберхавфсизлик бўлинмалари томонидан ўтказилган тезкор-қидирув тадбирлари натижасида, мазкур жиноятни Наманган шаҳрида яшовчи 20 ёшли О.А. содир этгани аниқланган.
Гумонланувчи сифатида тергов органларига жалб этилган О.А., А.Р. билан Telegram мессенжери орқали ўзини “Аброр” деб таништириб, А.Р.ни яхши кўриб қолганини, келгусида унга уйланиш мақсади борлигини айтиб, уни ишончига кирган. Шу орқали у қизнинг турли фотосуратлари ва беҳаё видеотасвирларини қўлга киритиб, ижтимоий тармоқларда тарқатиб юбориш билан қўрқитган ва тарқатмаслик эвазига 1 миллион сўм пулларни А.Р.дан олган вақтида ушланган.
Мазкур ҳолат юзасидан Жиноят кодексининг 165-моддаси 1-қисми билан жиноят иши қўзғатилиб, О.А.нинг содир этилиб фош этилмай қолган бошқа шу турдаги жиноятларга алоқадорлиги юзасидан тезкор-суриштирув ишлари олиб борилмоқда. Қонунчиликка мувофиқ, бундай жиноий хатти-ҳаракатлар учун 3 йилдан 5 йилгача озодликдан маҳрум этилиш мумкин.
Ўзгаларнинг шахсий маълумотларини тарқатиш орқали пул ундириш ҳолатлари
- Июль охирларида Бухоро шаҳрида эркак билан ишқий муносабатда бўлиб, уни турмуш ўртоғига ошкор қилмаслик эвазига телефон талаб қилган қиз қўлга олинганди.
- Май ойида Тошкентда аёлнинг фото-видеоларини эри ва қайнотасига кўрсатишини айтиб, ундан пул талаб қилган эркак ушлангани,
- Тошкент вилоятида 19 ёшли қизнинг суратларини тарқатиш билан таҳдид қилган йигит қўлга тушгани тўғрисида хабар берилганди.
Изоҳ (0)