Фарғонада 126 нафар ишчи-ходимнинг 836,5 млн сўмлик иш ҳақлари ундирилди

Мажбурий ижро бюроси Фарғона вилояти бошқармаси ва унинг ҳудудий бўлимлари томонидан 126 нафар ишчи-ходимнинг иш ҳақлари ундириб берилди. Бу ҳақда Бош прокуратура матбуот хизмати хабар берди.

Қайд этилишича, иш ҳақларини ундириш бўйича 2023 йилнинг ўтган даврида 100 ортиқ ижро ҳужжатлари ижроси тамомланиб, 126 нафар ишчи-ходимларга 836,5 миллион сўм иш ҳақлари ундириб берилган.

Шу билан бирга, аҳолининг ижтимоий ҳимояга муҳтож қатламини қўллаб қувватлаш мақсадида “темир дафтар”, “аёллар дафтари” ва “ёшлар дафтари” жамғармаларига 36,3 миллиард сўм йўналтирилган.

Шунингдек, алимент ундируви билан боғлиқ 32 мингдан ортиқ ижро ҳужжатлари юзасидан ижро ҳаракатлари олиб борилиб, ундирувчиларга 21,2 миллиард сўм тўловлар ундириб берилиши таъминланган. Шунингдек, ишсиз алимент тўловчи фуқароларнинг 915 нафари ишга жойлаштирилган, тушунтиришлар натижасида 852 та оилалар яраштирилган.

Узоқ муддат давомида алимент тўловларини тўлашдан бўйин товлаган 620 нафар шахсларга нисбатан маъмурий ва 44 нафар шахсларнинг жиноий жавобгарлик масаласи ҳал қилинган.

Бундан ташқари, вояга етмаган фарзандига алимент тўламагани учун жиноий жавобгарликка тортилган шахсларнинг алимент қарздорликлари Мажбурий ижро бюроси ҳузуридаги Жамғарма ҳисобидан қоплаб берилмоқда. Бугунги кунда 375 миллион сўмдан ортиқ зарарлар жамғарма маблағлари ҳисобидан вояга етмаганлар фойдасига қоплаб берилган.