Туриннинг “Ювентус” клубига Аньеллилар оиласи эгалик қилаётганининг 100 йиллиги муносабати билан афсоналар ўртасида ўртоқлик ўйини бўлиб ўтди.
Учрашув Туриндаги “Пала Алпитур” аренасида бўлиб ўтди. Ретро ўйин “Ювентус” афсоналари ўртасида 7 га 7 форматда ўтказилди. Массимилиано Аллегри бошчилигидаги “Ювентус”нинг ҳозирги таркиби эса томошабин сифатида иштирок этди.
“Оқлар” таркибида Анжело Перуцци, Морено Торричелли, Андреа Барзалйи, Марк Юлиано, Клаудио Маркизио, Зинедин Зидан ва Алессандро Матри иштирок этди; захирада эса Антонио Конте ва Паоло Монтеро бор эди. Бош мураббий эса Мишел Платини.
“Қоралар” сафида Марко Сторари, Анжело ди Ливио, Чиро Феррара, Патрис Эвра, Эдгар Давидс, Марио Манжукич ва Алессандро дел Пьеро тўп сурди; захирадан Массимо Каррера ва Фабрисио Раванелли жой олган. Бу жамоага Жанлука Пессотто ва Марчелло Липпи мураббийлик қилди.
Учрашув “оқлар”нинг 9:6 ҳисобидаги ғалабаси билан якунланди.
Изоҳ (0)