Ўзбекистонда 15-19 ёшли қизларнинг 33 фоизи эр ўз хотинини калтаклашга ҳақли деб ҳисоблайди

Ўзбекистонда истиқомат қилувчи 15-19 ёшли қизларнинг 33 фоизи, яъни учдан бир қисми эр ўз хотинини калтаклашга ҳақли деб ҳисоблайди. Бу ҳақда Ижтимоий ҳимоя миллий агентлиги, Адлия вазирлиги ва ЮНИСЕФ ҳамкорлигидаги давра суҳбатида маълум қилинган. 

Бугун, 10-октябр куни бўлиб ўтган давра суҳбатида болаларни зўравонликнинг барча турларидан ҳимоя қилиш, Ўзбекистон болалари учун хавфсизроқ ва янада қулай муҳитни яратиш масаласи илгари сурилган. Ва бунинг учун “Болаларни зўравонликнинг барча шаклларидан ҳимоя қилиш тўғрисида”ги қонун лойиҳасини қабул қилишга чақирилган. 

Зўравонлик нафақат инсон ҳуқуқларини поймол қилади, у боланинг қолган ҳаётига ҳам таъсир ўтказади. Биз ушбу ўткир муаммо бўйича жимжитликка чек қўйиб, бу муаммо ҳали ҳам мавжуд бўлишига сабабчи жамиятдаги муносабатни ўзгартирмоқчимиз, — деди Ижтимоий ҳимоя миллий агентлиги директорининг биринчи ўринбосари Шаҳноза Мирзиёева.

Таъкидланишича, зўравонликни тўхтатиш бўйича махсус қонуннинг қабул қилиниши Ўзбекистон Жиноят кодексига яқинда киритилган ўзгартишларга мос келади, бу эса, ўз навбатида, қизлар, ўғил болалар ва аёлларни зўравонликдан ҳуқуқий ҳимоя қилишни кучайтиради. 

Давра суҳбатида қўшимча қилинишича, жаҳон миқёсида ҳар йили дунё бўйлаб 1 миллиарддан ортиқ бола жисмоний, ҳиссий ёки жинсий зўравонликка дучор бўлади. 

Яқинда ўтказилган Мултииндикатор кластер кузатуви (MICS) шуни кўрсатдики, Ўзбекистонда 1 ёшдан 14 ёшгача бўлган 3 нафар боладан 2 нафари (62 фоиз) зўравонлик билан тарбиялаш усулларини бошдан кечирган (жисмоний жазо ва/ёки психологик тажовуз), 15-19 ёшли қизларнинг 33 фоизи эр ўз хотинини калтаклашга ҳақли деб ҳисоблайди. Қонун қабул қилинганидан сўнг, бу қонун оилавий маслаҳатлар, руҳий саломатлик ва руҳий-ижтимоий қўллаб-қувватлаш, ҳаётий кўникмаларга ўргатиш ҳамда хавфсиз уй-жойдан фойдаланиш имконини бериш, фаровонликни таъминлаш ва зўравонлик, қўрқув ҳамда зарардан ҳимоя қилиш каби хавфсизликни ошириш, ҳуқуқий кафолатларни кучайтириш ва такомиллаштирилган қўллаб-қувватлаш тизимлари орқали Ўзбекистон бўйлаб қизлар ва ўғил болалар учун фойдали бўлади, — дейилади давра суҳбати ҳақидаги расмий ахборотда.