2022 йилда электр энергияси ишлаб чиқаришда асосан қандай манбалардан фойдаланилган?

2022 йилда бутун дунё бўйлаб 29 165,2 тераватт соат (TVт) электр энергияси ишлаб чиқарилди, бу 2021 йилга нисбатан 2,3 фоизга кўп.

Visualcapitalist сайти маълумотларига кўра, электр энергияси ишлаб чиқариш бўйича ҳали ҳам кўмирдан фойдаланиш етакчилик қилмоқда.

2022 йилда глобал энергиянинг 35,4 фоизи кўмирни ёқиш орқали ишлаб чиқарилган. Бу борада иккинчи ўринда табиий газ бўлиб, “мовий ёқилғи” орқали бутун дунёдаги 22,7 фоиз электр энергияси ишлаб чиқарилган. 

Гидроэлектрстанциялар эса глобал электр энергиянинг 14,9 фоизни ташкил этади. Кейинги ўринларни Атом электр станциялари (9,2%), шамол электрстанциялари (7,2%) ва қуёш электрстанциялари (4,5%) эгаллайди.

Суюқ ёқилғи орқали ишлаб чиқарилган электр энергияси жами 2,5% ни ташкил қилган бўлса, яна бошқа турли усуллар билан электр олиш ҳиссаси 2,7% га етган.

Шуни ҳам таъкидлаш керакки, 2022 йилда шамол, қуёш ва геотермал каби қайта тикланадиган манбалар жами электр энергияси ишлаб чиқаришнинг 14,4 фоизини ташкил этди. Бу манбалардан фойдаланиш аввалги йилга нисбатан 14,7 фоизга ошган. 

Қайта тикланмайдиган энергия манбаларини ишлатиш эса атиги 0,4% га ошганини кўриш мумкин.