Президент ҳузуридаги Давлат хизматини ривожлантириш агентлиги ўтказган таҳлилларга кўра, Ўзбекистондаги мавжуд вазирликлар марказий аппаратидаги раҳбарларнинг 40 фоизи туман поғонасини кўрмаган, туман миқёсидаги раҳбарларнинг 60 фоизи эса вилоят ёки республика идораларида ишламагани маълум бўлди.
Давлатимиз раҳбари давлат идораларида “маҳалладан – республикагача” тамойили асосида кадрларни ўстиришга алоҳида эътибор қаратиш зарурлигини таъкидлаганди. Мазкур ташаббуснинг моҳияти шундаки, эндиликда туман ва шаҳар даражасидаги раҳбарлик учун салоҳиятли кадрлар резерви тузилади, унга номзодлар фақат маҳаллалардаги ҳоким ёрдамчилари ва ёшлар етакчилари орасидан танлаб олинади, — дейди агентлик ахборот хизмати раҳбари Севара Зокирова.
Масъулнинг маълумот беришича, ўтган икки йил ичида маҳаллалардаги ҳоким ёрдамчилари, ёшлар етакчилари ва хотин-қизлар фаоллари лавозимларининг жорий этилиши давлат фуқаролик хизмати олдида турган қатор муҳим масалаларни бирламчи бўғинда ҳал қилишга ёрдам бермоқда.
Биринчидан, давлат фуқаролик хизматига 30 мингга яқин садоқатли ва шижоатли, ҳар бир масалага ностандарт ечим топишга қодир янги авлод кадрлари кириб келди. Иккинчидан, салоҳиятли кадрлар резерви “паст”ни кўрган, муаммоларни ўрганган, бевосита фуқаролар билан ишлаган кадрлар билан таъминланди. Учинчидан, ҳоким ёрдамчиси, ёшлар етакчиси ва хотин-қизлар фаоли давлат бошқарувининг бевосита энг қуйи бўғинига қадар кириб боришига ва айнан маҳалла даражасида давлат сиёсатини янада кучайтиришга эришилмоқда, — дейди у.
Таъкидланишича, маҳаллаларда фаолият юритаётган ҳоким ёрдамчилари, ёшлар етакчилари ва хотин-қизлар фаоллари орасидан 1000 нафари салоҳиятли кадрлар резервига саралаб олинган.
Номзодларни саралаб олиш жараёнида Оила ва хотин-қизлар қўмитаси, Маҳаллабай ишлаш ва тадбиркорликни ривожлантириш, Ёшлар ишлари агентлиги ҳамда маҳаллий ҳокимликлар билан ҳамкорлик қилинди. Дастлаб фаолиятда ижобий натижаларга эришган, халқ билан ҳамкорлик қилаётган номзодлар сараланди. Иккинчи босқичда, назарий билимлари ва психологик ҳолатини аниқлаш мақсадида номзодлар тест синовидан ўтказилди. Сўнгра уларнинг касбий ва бошқарув кўникмаларини баҳолаш мақсадида суҳбат ташкил этилди. Суҳбат жараёнида номзоднинг лидерлик қобилияти, тизимли фикрлаши, натижага йўналганлик, мослашувчанлик ва коммуникативлик компетенсияларини аниқлашга алоҳида урғу берилди. Натижада 754 нафар ҳоким ёрдамчиси, 196 нафар ёшлар етакчиси ва 50 нафар хотин-қизлар фаоли салоҳиятли кадрлар резервига саралаб олинди, — дейди Севара Зокирова.
Айтилишича, номзодларнинг рейтинг кўрсаткичлари шакллантирилиб, “олтин”, “кумуш” ва “бронза” захираларга ажратилган.
Ўтган давр ичида меҳнат фаолиятида ижобий ютуқларга эришган салоҳиятли кадрлар резервидаги номзодларнинг 158 нафари турли даражадаги раҳбарлик лавозимларга тайинланди, — дейди Севара Зокирова.
Изоҳ (0)