Prezident huzuridagi Davlat xizmatini rivojlantirish agentligi o‘tkazgan tahlillarga ko‘ra, O‘zbekistondagi mavjud vazirliklar markaziy apparatidagi rahbarlarning 40 foizi tuman pog‘onasini ko‘rmagan, tuman miqyosidagi rahbarlarning 60 foizi esa viloyat yoki respublika idoralarida ishlamagani ma’lum bo‘ldi.
Davlatimiz rahbari davlat idoralarida “mahalladan – respublikagacha” tamoyili asosida kadrlarni o‘stirishga alohida e’tibor qaratish zarurligini ta’kidlagandi. Mazkur tashabbusning mohiyati shundaki, endilikda tuman va shahar darajasidagi rahbarlik uchun salohiyatli kadrlar rezervi tuziladi, unga nomzodlar faqat mahallalardagi hokim yordamchilari va yoshlar yetakchilari orasidan tanlab olinadi, — deydi agentlik axborot xizmati rahbari Sevara Zokirova.
Mas’ulning ma’lumot berishicha, o‘tgan ikki yil ichida mahallalardagi hokim yordamchilari, yoshlar yetakchilari va xotin-qizlar faollari lavozimlarining joriy etilishi davlat fuqarolik xizmati oldida turgan qator muhim masalalarni birlamchi bo‘g‘inda hal qilishga yordam bermoqda.
Birinchidan, davlat fuqarolik xizmatiga 30 mingga yaqin sadoqatli va shijoatli, har bir masalaga nostandart yechim topishga qodir yangi avlod kadrlari kirib keldi. Ikkinchidan, salohiyatli kadrlar rezervi “past”ni ko‘rgan, muammolarni o‘rgangan, bevosita fuqarolar bilan ishlagan kadrlar bilan ta’minlandi. Uchinchidan, hokim yordamchisi, yoshlar yetakchisi va xotin-qizlar faoli davlat boshqaruvining bevosita eng quyi bo‘g‘iniga qadar kirib borishiga va aynan mahalla darajasida davlat siyosatini yanada kuchaytirishga erishilmoqda, — deydi u.
Ta’kidlanishicha, mahallalarda faoliyat yuritayotgan hokim yordamchilari, yoshlar yetakchilari va xotin-qizlar faollari orasidan 1000 nafari salohiyatli kadrlar rezerviga saralab olingan.
Nomzodlarni saralab olish jarayonida Oila va xotin-qizlar qo‘mitasi, Mahallabay ishlash va tadbirkorlikni rivojlantirish, Yoshlar ishlari agentligi hamda mahalliy hokimliklar bilan hamkorlik qilindi. Dastlab faoliyatda ijobiy natijalarga erishgan, xalq bilan hamkorlik qilayotgan nomzodlar saralandi. Ikkinchi bosqichda, nazariy bilimlari va psixologik holatini aniqlash maqsadida nomzodlar test sinovidan o‘tkazildi. So‘ngra ularning kasbiy va boshqaruv ko‘nikmalarini baholash maqsadida suhbat tashkil etildi. Suhbat jarayonida nomzodning liderlik qobiliyati, tizimli fikrlashi, natijaga yo‘nalganlik, moslashuvchanlik va kommunikativlik kompetensiyalarini aniqlashga alohida urg‘u berildi. Natijada 754 nafar hokim yordamchisi, 196 nafar yoshlar yetakchisi va 50 nafar xotin-qizlar faoli salohiyatli kadrlar rezerviga saralab olindi, — deydi Sevara Zokirova.
Aytilishicha, nomzodlarning reyting ko‘rsatkichlari shakllantirilib, “oltin”, “kumush” va “bronza” zaxiralarga ajratilgan.
O‘tgan davr ichida mehnat faoliyatida ijobiy yutuqlarga erishgan salohiyatli kadrlar rezervidagi nomzodlarning 158 nafari turli darajadagi rahbarlik lavozimlarga tayinlandi, — deydi Sevara Zokirova.
Izoh (0)