Тошкент вилояти ҳокими Зоир Мирзаев Қибрай тумани ҳокими ўринбосарлари, ҳокимликнинг бошқа барча мутахассисларини вазифасидан озод қилган эди. Вилоят ҳокимлиги ахборот хизматининг маълум қилишича, 47 нафар мансабдор ўрнига янги раҳбарлар тайинланди.
Келтирилишича, Қибрай тумани ҳокимлигидаги маънавий муҳит, ижро аппарати фаолиятини тубдан яхшилаш мақсадида, кадрлар билан ишлашнинг “Қибрай тажрибаси” жорий қилинган эди. Шунга кўра, депутат, нуроний ва фаоллардан таркиб топган махсус ишчи гуруҳ Қибрай туманида 20 кун мобайнида ҳокимлик ҳамда корхона ва ташкилотлардаги раҳбар ходимларнинг фаолиятини тўлиқ ўрганиб, лавозимига “нолойиқ” деб топилган кадрларни алмаштириш тўғрисида вилоят ҳокимлигига тавсия хатини киритди.
Бугунги кунда, 64 нафар туман ҳокимлиги, корхона ва ташкилотлардаги раҳбар ходимлардан 47 нафари лавозимидан озод этилиб, уларнинг ўрнига ёш, салоҳиятли кадрлар тайинланди. Шунингдек, 17 нафар раҳбар кадрлар туман ҳокимининг кафолати асосида, синов муддати билан лавозимида қолдирилди.
Бундан ташқари, туман ҳокимлигида ишлаб келаётган 19 нафар раҳбар кадрлар эгаллаб турган лавозимидан озод қилинди, 10 нафари иш жойида синов муддати билан қолдирилди. Айни кунларда қолган лавозимларга муносиб номзодлар кўриб чиқилмоқда. Раҳбар кадрлар таркибининг ёш коэффициенти бўйича Қибрай тумани бугун вилоятда биринчи ўринга чиқди. Лавозимга тайинланганларнинг 25 нафари 25-35 ёшгача бўлган кадрлар.
Қайд этилишича, эндигина иш бошлаган кадрларнинг қарийб барчаси шу туманнинг фарзандлари. Вилоят корхона ва ташкилотларида раҳбарлик лавозимларида ишлаб келаётган 7 нафар кадр Қибрайга ишлаш учун юборилди.
Шунингдек, тумандаги мавжуд 35 та давлат ташкилотларига янги раҳбарлар тайинланди, лавозимига лойиқ бўлган 7 нафар раҳбар эса ўз вазифасида, синов муддати билан қолдирилди. Эндиликда бу кадрлар Президент администрацияси ҳузуридаги Давлат хизматларини ривожлантириш агентлиги орқали Давлат бошқаруви академиясида қисқа муддатли ўқув курсида таҳсил оладилар, бошқарув тизимининг сир-асрорларини пухта ўрганади. Ўқиш якунлари бўйича махсус тестларни топширади. Бу босқичда ҳам кадрлар таркиби яна бир бор қатъиян элакдан ўтказилади, синалади.
Изоҳ (0)