Бундан 5 йил аввал АҚШда UFC’нинг икки вазн тоифасидаги собиқ чемпиони ирландиялик Конор Макгрегор ва енгил вазн тоифасидаги чемпион доғистонлик Ҳабиб Нурмагомедов ўртасида UFC 229 мусобақасининг асосий жанги бўлиб ўтганди.
“Йил жанги” дея ном олган тўқнашув октагонда ҳам ундан ташқарида ҳам жуда катта шов-шувларга сабаб бўлганди.
Жангдан олдин
Конор Макгрегор 2017 йил август ойида енгилмас Флойд Мейвезер билан профессионал бокс қоидалари бўйича жанг қилиш учун UFC’даги фаолиятини тўхтатиб турганди. Доғистонлик жангчи эса 2018 йил апрель ойида Эл Яквинтани енгиб, узоқ кутилган чемпионликни қўлга киритганди.
Ҳабиб ва октагонга қайтаётган Конор ўртасидаги жанг қизғин кечиши маълум эди. Ирландиялик спортчи ўзининг характерига содиқ қолган ҳолда, жангдан олдинги бир неча тадбирларда Ҳабибни ҳақорат қилар, турли номақбул сўзларни айтарди. Нурмагомедов эса хотиржамликни зўрға сақлаб, барчасига октагонда жавоб қайтаришга ваъда берган.
Жангчилар жамоалари ўртасидаги адоватга Нурмагомедовнинг апрель ойидаги чемпионлик жангидаги воқеалар ҳам сабаб бўлган. Ўшанда Ҳабиб Конорнинг спарринг шериги россиялик Артём Лобовнинг юзига тарсаки туширганди ва Макрегор бунга жавобан доғистонлик спортчи ва унинг жамоаси автобусига ҳамла қилганди.
Жанг
2018 йилнинг 6-октябрь ойида Лас-Вегасда UFC 229 мусобақаси ўтказилди.
Биринчи раунддаёқ Ҳабиб жанг назоратини ўз қўлига олди. Конор эса рақибининг қучоғидан қочиб қутула олмади.
Иккинчи раундда эса Ҳабиб яна бир тейкдаунни амалга оширди ва Конордан устунлигини яққол намоён этди. Гонгдан сўнг Конор қийинчилик билан ўрнидан турди.
Учинчи раундда Ҳабиб “стойка”да жанг қилишга қарор қилди. Ушбу беш дақиқада Нурмагомедов чарчаб қолган Конорнинг ҳудудида жанг қилди.
Тўртинчи раундда Ҳабиб яна Конорни партерга олди. Макгрегор таслим бўлиб, Нурмагомедовнинг қўлига урди.
Жангдан сўнг
Ҳабиб Конорни қўйиб юборди ва ирландиялик спортчига нимадир деди. Сўнгра, ортига ўгирилиб, Макгрегор жамоаси томон ҳаракатланиб, октагондан сакраб ўтиб, Конорнинг мураббийи Диллон Денисга ташланди.
Бу пайтда доғистонлик жангчининг дўсти Зубайра Тухугов ва самбо бўйича собиқ чемпион Эседулла Эмирагаев Конор томон югурди. Чарчаган Макгрегор бир неча марта зарба қабул қилиб олди. Нурмагомедов жамоасининг уч нафар аъзоси вақтинча ҳибсга олинди.
UFC президенти Дана Уайт ғолибга камарни тақдим этмади ва кейинроқ матбуот анжумни спортчининг дисквалификация қилиниши мумкинлигини ҳам маълум қилганди.
Дисквалификация
Невада штати атлетика комиссияси Ҳабиб ва унинг жамоаси аъзолари иши бўйича ўз ҳукмини бир неча бор кечиктирди. 2019 йилнинг январь ойида Ҳабиб 9 ойга дисквалификация қилинди ва жанг учун гонорарнинг чорак қисми — 2 миллион доллардан 500 мингини йўқотди. Тартибсизликларда иштирок этган Макгрегор унчалик оғир бўлмаган жазо — 6 ойлик дисквалификация ва 50 минг доллар жаримага тортилган.
Кейинги фаолият
Ҳабиб Нурмагомедов 2019 йил сентябрь ойида Дастин Порьега қарши, 2020 йил октябрь ойида Жастин Гетжига қарши октагонга кўтарилди ва иккаласида ҳам ғалаба қозонди. Гетжига қарши жангдан сўнг Ҳабиб фаолиятини якунлади.
Конор Макгрегор эса 2020 йил Дональд Серронени мағлуб этди. Шундан сўнг икки марта Дастин Порьега қарши октагонга кўтарилиб, иккаласида ҳам мағлубиятга учради. 2021 йилдаги жангда Конор оёғини синдириб олганди. Макгрегор ҳозирда яна фаолиятини тиклаш ҳақида ўйламоқда.
Изоҳ (0)