Сурия ғарбидаги Хомс шаҳрида жойлашган ҳарбий коллежга 5 октябр куни дронлар ҳужум қилди. Оқибатда камида 80 киши ҳалок бўлди, 240 киши жароҳатланди. Бу ҳақда соғлиқни сақлаш вазири Ҳасан ал-Габбашга таяниб, Суриянинг Sana давлат агентлиги хабар берди.
Буюк Британияда жойлашган Сурия Инсон ҳуқуқлари обсерваторияси (СONR) маълум қилишича, қурбонлар орасида тинч аҳоли, жумладан аёллар ва болалар ҳам бор. Сурия соғлиқни сақлаш вазирлиги раҳбари олти аёл ва олти бола ҳалок бўлганига аниқлик киритди. Reuters манбасига кўра, ҳужум оқибатида камида 100 киши ҳалок бўлган.
Ҳужум ҳарбий хизматчилар ва уларнинг яқинлари иштирок этган битирув маросими вақтида содир бўлган. Reuters агентлигининг ёзишича, маросимда Сурия мудофаа вазири Али Маҳмуд Аббос ҳам қатнашган. Агентлик маълумотларига кўра, у дрон ҳужумидан бир неча дақиқа олдин тадбирни тарк этганди.
Сурия Мудофаа вазирлиги ҳужумда “таниқли халқаро партиялар томонидан қўллаб-қувватланган террорчилик гуруҳлари”ни айблади ва ҳужумга жавоб қайтаришга ваъда берди. Ҳозирча ҳеч бир гуруҳ содир бўлган воқеа учун жавобгарликни ўз зиммасига олмади. Коллежга ҳужум бўлишидан олдин, Reuters қайд этишича, Сурия ҳукумат кучлари Идлиб вилоятида мухолифат назоратидаги ҳудудга ҳужум қилган эди.
Сурия Ташқи ишлар вазирлиги БМТ ва ташкилот Хавфсизлик кенгашини ҳужумни қоралашга чақирди. Сурия ҳукумати қурбонлар хотирасига уч кунлик мотам эълон қилди.
Изоҳ (0)