Тошкент вилоятида “Сувчилар мактаби” лойиҳасига бағишланган матбуот анжумани ва пресс-тур бўлиб ўтди

Бундан 4 ой муқаддам Президентнинг бевосита ташаббуси билан Агробанк, Сув хўжалиги вазирлиги, “Тошкент ирригация ва қишлоқ хўжалигини механизациялаш муҳандислари институти” миллий тадқиқот университети ҳамкорликда “Сувчилар мактаби” лойиҳаси йўлга қўйилган эди. Ўтган ҳафта якунида Тошкент вилоятида мазкур мактаб ва унда эришилган дастлабки натижаларга бағишланган матбуот анжумани ва пресс-тур бўлиб ўтди. Мазкур лойиҳа ОАВ вакиллари, эксперт ва қишлоқ хўжалиги соҳаси мутахассислари ҳамда маҳаллий фермер ва тадбиркорларнинг эътиборини тортди.

Матбуот анжуманида банк мутасаддилари томонидан “Сувчилар мактаби” лойиҳаси ҳақида батафсил маълумот берилди ва шу кунгача амалга оширилган ишлар ва келажакдаги режаларга бағишланган тақдимот ўтказилди.

Таъкидлаб ўтиш лозимки, Агробанк Ўзбекистондаги етакчи банкларидан бири сифатида мамлакатимиз қишлоқ хўжалиги соҳасини ривожлантиришга қаратилган бир қатор лойиҳаларни амалга ошириб келмоқда ва фаол қўллаб-қувватламоқда. Ушбу фаолиятнинг асосий элементларидан бири сифатида “Сувчилар мактаби” лойиҳасини кўрсатиб ўтишимиз мумкин. Ушбу ташаббус мамлакат қишлоқ хўжалигида сувдан фойдаланиш самарадорлигини оширишга қаратилган.

“Сувчилар мактаби” фермерлар, қишлоқ хўжалиги мутахассислари ва қишлоқ жойларда сув таъминоти ва суғориш тизимлари билан шуғулланувчи ҳар бир киши учун мўлжалланган ўқув ва амалий дастурларни тақдим этади. Дастурнинг мақсади иштирокчиларни сувдан фойдаланиш самарадорлигини ошириш учун замонавий усуллар ва технологияларига ўргатишдан иборат.

Агробанк вакилларининг маълум қилишича, лойиҳани амалга ошириш, жумладан, таълим дастурини ишлаб чиқиш учун Туркия, Испания, Хитой каби давлатларнинг тажрибалари ўрганилган, шунингдек, фермерлар ўртасида сўровнома ўтказилган.

“Сувчилар мактаби”нинг 1-босқичи доирасида ҳозирга қадар 154 та туманда жами 60 330 нафар фермер ва сувчи, жумладан, 56 633 нафар фермер хўжалиги раҳбари ва сувчилари, 4 350 нафар махсус хизмат мироблари ва 2 347 нафар банк ходимлари жалб қилиниб малакалари оширилган.

Ўқув курслари учун 5 та сайёр микроавтобуслар олинган. Лойиҳага жами 50 нафардан ортиқ профессор-ўқитувчилар, соҳа мутахассислари, жумладан, 15 нафар туркиялик, 2 нафар испаниялик мутахассислар жалб қилинган.

Жорий йил охирига қадар республиканинг ҳар бир ҳудудида “Сувчилар мактаби” ташкил этиш режалаштирилган.

Реклама ҳуқуқи асосида.