Bundan 4 oy muqaddam Prezidentning bevosita tashabbusi bilan Agrobank, Suv xo‘jaligi vazirligi, “Toshkent irrigatsiya va qishloq xo‘jaligini mexanizatsiyalash muhandislari instituti” milliy tadqiqot universiteti hamkorlikda “Suvchilar maktabi” loyihasi yo‘lga qo‘yilgan edi. O‘tgan hafta yakunida Toshkent viloyatida mazkur maktab va unda erishilgan dastlabki natijalarga bag‘ishlangan matbuot anjumani va press-tur bo‘lib o‘tdi. Mazkur loyiha OAV vakillari, ekspert va qishloq xo‘jaligi sohasi mutaxassislari hamda mahalliy fermer va tadbirkorlarning eʼtiborini tortdi.
Matbuot anjumanida bank mutasaddilari tomonidan “Suvchilar maktabi” loyihasi haqida batafsil maʼlumot berildi va shu kungacha amalga oshirilgan ishlar va kelajakdagi rejalarga bag‘ishlangan taqdimot o‘tkazildi.
Taʼkidlab o‘tish lozimki, Agrobank O‘zbekistondagi yetakchi banklaridan biri sifatida mamlakatimiz qishloq xo‘jaligi sohasini rivojlantirishga qaratilgan bir qator loyihalarni amalga oshirib kelmoqda va faol qo‘llab-quvvatlamoqda. Ushbu faoliyatning asosiy elementlaridan biri sifatida “Suvchilar maktabi” loyihasini ko‘rsatib o‘tishimiz mumkin. Ushbu tashabbus mamlakat qishloq xo‘jaligida suvdan foydalanish samaradorligini oshirishga qaratilgan.
“Suvchilar maktabi” fermerlar, qishloq xo‘jaligi mutaxassislari va qishloq joylarda suv taʼminoti va sug‘orish tizimlari bilan shug‘ullanuvchi har bir kishi uchun mo‘ljallangan o‘quv va amaliy dasturlarni taqdim etadi. Dasturning maqsadi ishtirokchilarni suvdan foydalanish samaradorligini oshirish uchun zamonaviy usullar va texnologiyalariga o‘rgatishdan iborat.
Agrobank vakillarining maʼlum qilishicha, loyihani amalga oshirish, jumladan, taʼlim dasturini ishlab chiqish uchun Turkiya, Ispaniya, Xitoy kabi davlatlarning tajribalari o‘rganilgan, shuningdek, fermerlar o‘rtasida so‘rovnoma o‘tkazilgan.
“Suvchilar maktabi”ning 1-bosqichi doirasida hozirga qadar 154 ta tumanda jami 60 330 nafar fermer va suvchi, jumladan, 56 633 nafar fermer xo‘jaligi rahbari va suvchilari, 4 350 nafar maxsus xizmat miroblari va 2 347 nafar bank xodimlari jalb qilinib malakalari oshirilgan.
O‘quv kurslari uchun 5 ta sayyor mikroavtobuslar olingan. Loyihaga jami 50 nafardan ortiq professor-o‘qituvchilar, soha mutaxassislari, jumladan, 15 nafar turkiyalik, 2 nafar ispaniyalik mutaxassislar jalb qilingan.
Joriy yil oxiriga qadar respublikaning har bir hududida “Suvchilar maktabi” tashkil etish rejalashtirilgan.
Reklama huquqi asosida.
Izoh (0)