Олий Мажлис Сенатининг 29-сентябр куни ўтказилган ялпи мажлисида Uzbekistan Airways’га қарашли авиакассалардан чипталар олишдаги муаммо танқид қилинганди. Авиакомпания чипталарни харид қилиш билан боғлиқ мазкур ҳолатга муносабат билдирди.
Маълум қилинишича, авиакомпания рейсларига йўловчи авиаташувларини сотишни тартибга солувчи амалдаги норматив ҳужжатларда (қоидалар ва йўриқномалар) авиакассирлардан йўловчиларнинг шахсини тасдиқловчи ҳужжатларнинг асл нусхаси асосида авиачипталарни расмийлаштиришни талаб қилувчи бандлар мавжуд эмас. Uzbekistan Airways Sales филиалида ёки авиакомпания агентларида авиачипта сотуви йўловчиларнинг шахсини тасдиқловчи гувоҳномаларнинг асл нусхалари асосида ҳам, уларнинг фотонусхалари асосида ҳам амалга оширилади.
“Бундан ташқари, авиакомпания расмий интернет-сайти ва мобил иловаси орқали авиачипталарни сотишни фаол ривожлантирмоқда, бунда йўловчиларнинг маълумотлари тўғридан тўғри авиачипта расмийлаштираётган шахс томонидан тизимга киритиладиган. Шуни таъкидлаш керакки, барча белгиланган маълумотлар йўловчининг шахсини тасдиқловчи ҳужжатга қатъий мувофиқ равишда брон қилиш тизимига хатосиз киритилиши керак. Киритилган маълумотларнинг тўғрилиги учун ташувга тўловни амалга ошираётган шахс жавобгар бўлади, чунки ушбу шартга риоя қилмасдан авиачипта сотиб олиш имконсиз бўлади”, — дейилади муносабатда.
Қайд этилишича, Ўзбекистон фуқаролари учун виза режими жорий этилган узоқ хориж мамлакатларига авиачипталарни сотишда йўловчига ҳамда авиакомпанияга жарима санкциялари қўлланмаслиги учун Uzbekistan Airways Sales филиали авиакассаларида ва авиакомпания агентларидан белгиланган мамлакатнинг амалдаги визаси билан паспорт талаб қилинади.
“Чипта ва паспорт маълумотларидаги ҳар қандай ноаниқликлар ва номувофиқликлар жарималарга ёки кириш учун асос йўқлиги сабабли йўловчини жўнаш мамлакатига қайтариб юборишга олиб келиши мумкин. Шу сабабли, авиачипталарни кассир томонидан расмийлаштиришда ёки онлайн расмийлаштиришда мижоз томонидан йўловчининг белгиланган маълумотлари ва бориш мамлакатининг амалдаги визалари тўғри киритилиши жуда муҳимдир”, — дея таъкидланади хабарда.
Шунингдек, йўловчини қатновга рўйхатдан ўтказиш вақтида йўловчининг белгиланган маълумотлари Ўзбекистон аэропортлари ер усти хизмат кўрсатиш хизматларининг рўйхатга олиш агентлари томонидан бевосита паспортнинг асл нусхасидан тизимга қайта киритилади.
Юзага келган саволлар ва тушунмовчиликларни инобатга олган ҳолда, Uzbekistan Airways АЖ томонидан Ўзбекистонда ва ундан ташқарида авиачипталарни сотиш бўйича барча агентларга авиачипталарни сотиб олишда йўловчилар ёки уларнинг яқинлари томонидан йўловчининг шахсини тасдиқловчи ҳужжатларнинг асл нусхаларини тақдим этиш зарурати йўқлиги тўғрисида навбатдаги эслатма юборилган.
Мудофаа ва хавфсизлик масалалари қўмитаси раиси Қутбиддин Бурхонов қўмитага келиб тушган мурожаат асосида Uzbekistan Airways АЖга қарашли авиакассалар фаолияти билан боғлиқ айрим муаммолар сабаблари дастлабки тарзда ўрганилганини билдириб, авиачипта сотишда эскирган бюрократик усуллар ҳамон сақланиб қолаётганини айтганди.
Изоҳ (0)