Наманган вилоятининг собиқ ҳокими Тўлқин Жабборов вафот этди. Бу ҳақда “Дарё” мухбири Азизбек Абдувалиев хабар бермоқда.
Тўлқин Жабборов 1996—2004 йилларда Наманган вилоятига раҳбарлик қилганди. 2000—2005 йилларда Олий Мажлис депутати этиб сайланган.
Вилоятда, хусусан, қишлоқ хўжалиги, қурилиш ва ободонлаштириш билан боғлиқ кўплаб ўзгаришлар Тўлқин Жабборов шахси билан боғланади.
Жумладан, Наманган шаҳридаги машҳур фаввора, “Паҳлавон” спорт мажмуаси, “Кичкинтойлар боғи”, Боулинг маркази, “Жаҳон” бозори каби иншоотлар қурилиши, вилоят театри, шаҳар-туманлардаги тез тиббий ёрдам бўлимлари капитал таъмири, Жийдакапа ва Янгиқўрғон йўлларининг кенгайтирилиши, замонавий тиббиёт ускуналари ва қишлоқ хўжалиги техникалари келтирилиши ушбу йилларда амалга оширилган.
Тўлқин Жабборов бугун, 4-октябрь куни узоқ давом этган хасталикдан сўнг оламдан ўтди. У 73 ёшни қаршилаган эди.
Изоҳ (0)