“Вазият тўлиқ назоратга олинган” — Тошкент ҳокимлиги Сергелидаги портлаш ҳақида

Тошкент шаҳри Сергели туманидаги “Қурувчилар” даҳасида Inter Logistics МЧЖга қарашли омборхонада кучли портлаш содир бўлгани тўғрисида хабар берилганди. Тошкент шаҳар ҳокимлиги ҳолат юзасидан маълумот берди.

Қайд этилишича, ушбу ҳодиса оқибатида жароҳатланганларга тиббий ёрдам кўрсатилмоқда.

“Ҳозирда вазият тўлиқ назоратга олинган. Ёнғин соат 05:02 да қуршаб олинган. Тезкор ҳаракатлар натижасида ёнғин майдони қисқартирилиб борилмоқда”, — дейилади хабарда.

Воқеа жойида дастлабки дақиқалардан бошлаб ФВВ раҳбарияти ҳамда куч ва воситалари, шунингдек, Тошкент шаҳар ҳокимлиги, Соғлиқни сақлаш бош бошқармаси, Ички ишлар органлари ва бошқа тегишли ташкилотлар мутасаддилари ҳодиса жойида иш олиб бормоқда. Шунингдек, ёнғин келиб чиқиш сабабини аниқлаш чоралари кўрилмоқда.

“Азиз ҳамшаҳарлар, аниқ ва ишончли маълумотларни фақат ишончли манбалардан олишингизни ва ўзингизни эҳтиёт қилишингизни сўраймиз”, — дея таъкидланади хабарда.

• Соғлиқни сақлаш вазирлининг маълум қилишича, портлаш оқибатида жароҳатланганлар Республика шошилинч тиббий ёрдам илмий маркази ва унинг Тошкент вилояти филиалига олиб келинган.
• Uzbekistan Airports’га кўра, Тошкентдаги портлаш пойтахт аэропорти фаолиятига таъсир қилмаган.
• Воқеа пойтахт аэропорти фаолиятига таъсир кўрсатмаган, “Тошкент” халқаро аэропорти чекловларсиз одатий режимда ишламоқда.