Сергелидаги омборхонада кучли портлаш рўй берди: жароҳатланганлар бор (видео)

28 сентябрь куни тунда Тошкент шаҳри Сергели туманидаги “Қурувчилар” даҳасида Inter Logistics МЧЖга қарашли омборхонада кучли портлаш содир бўлди. Бу ҳақда ФВВ матбуот хизмати хабар берди.

Қайд этилишича, соат 02:43 да ёнғин содир бўлаётгани тўғрисида ФВБга хабар тушган. Шунга кўра, 16 та ёнғин-қутқарув экипажи ва 3 та автонарвон соат 02:48 да ҳодиса рўй берган ҳудудга етиб борган. Ёнғинни ўчириш ишлари амалга оширилмоқда.

Ижтимоий тармоқларда тарқалаётган видеоларда кучли портлаш овозини эшитиш мумкин. Яқин атрофдаги хонадонларга зарар етган. Савдо ва бошқа марказлар жиддий зарар етган. Хонадонларга тез ёрдам машиналари етиб борган.

ФВВ ҳодиса “Самолёт қулаши оқибатида содир бўлган” мазмунидаги хабарларни рад этди. Соат 06:25 ҳолатига кўра, ёнғинни ўчириш ишлари давом этмоқда.

“Вазият тўлиқ назоратга олинган. Ёнғин соат 05:02 да қуршаб олинган. ФВВ ходимларининг тезкор ҳаракатлари натижасида ёнғин майдони қисқартирилиб борилмоқда. Воқеа жойида дастлабки дақиқалардан бошлаб ФВВ раҳбарияти ҳамда куч ва воситалари, шунингдек, тегишли ташкилотлар ходимлари иш олиб бормоқда. Ёнғин келиб чиқиш сабабини аниқлаш мақсадида ФВВнинг махсус лабораторияси ҳодиса жойида иш олиб бормоқда. Воқеа жойида ФВВ раҳбарлигида штаб ташкил этилган”, — дейилади хабарда.

Соғлиқни сақлаш вазирлининг маълум қилишича, портлаш оқибатида жароҳатланганлар Республика шошилинч тиббий ёрдам илмий маркази ва унинг Тошкент вилояти филиалига олиб келинган.

“Ҳозирга қадар улар орасида ўта оғир тан жароҳати олганлар йўқ. Айни пайтда шифокорлар томонидан жабрланганларга барча керакли тиббий ёрдам кўрсатилмоқда”, — дейилади хабарда.

Даволаш муассасаларида тезкор тиббий ёрдам кўрсатиш учун шифокорлар ва барча зарур дори-дармон захираси яратилгани таъкидланди. Ёнғин оқибатида воқеа жойи ва унинг атрофидаги хонадонларда жароҳатланганларга ҳам шошилинч тиббий ёрдам кўрсатилмоқда.

Сергели тумани Жиноят қидирув бўлими ходимининг “Газета.уз”га маълум қилишича, портлаш сабаблари ҳозирча аниқланмаган. Ёнғин ҳали ҳам ўчириб бўлингани йўқ.

Uzbekistan Airports'га кўра, Тошкентдаги портлаш пойтахт аэропорти фаолиятига таъсир қилмаган. Воқеа пойтахт аэропорти фаолиятига таъсир кўрсатмаган, “Тошкент” халқаро аэропорти чекловларсиз одатий режимда ишламоқда.

Ҳодиса жойида ФВВнинг махсус лабораторияси иш олиб бормоқда