Россия президенти Владимир Путин фронтдаги вазият ҳақида ҳақиқий маълумотга эга эмас. Бу ҳақда Украина разведкаси вакили анонимлик шарти билан НВ нашрига хабар берди.
Маълум қилинишича, бунга россиялик генералларга қарши бир қатор жиноий ишлар қўзғатилгани сабаб бўлган. Бу Путинга жанг майдонидаги салбий хабарларни етказмасликка олиб келган.
“Ҳеч ким унга ёмон хабар етказишга журъат эта олмайди. Шунинг учун Путин нима бўлаётгани, айниқса жанг майдонида кечаётган воқеаларнинг ҳақиқий манзарасини тушунмайди”, — деди манба.
Мазкур ҳолат Украина учун ҳам ижобий, ҳам салбий таъсир кўрсатиши қайд этилди. Бунгача Америка ва Британия разведкаси тегишли фикрни илгари сурганди. Жумладан, Путинга Россия армиясининг ҳақиқий йўқотишлари ва Ғарб санкциялари оқибатлари ҳақида айтмасдан, атайлаб нотўғри маълумот берилган бўлиши мумкин.
АҚШ бунинг учун Россия президентининг энг яқин маслаҳатчилари жавобгар бўлиши мумкинлигини билдирган.
НАТО қўшма кучларининг собиқ қўмондони, истеъфодаги генерал Уэсли Кларкнинг фикрича, Путин Россия ҳарбийлари унга ёлғон гапираётганини билади.
Изоҳ (0)