Канада бош вазири Жастин Трюдо Британия Колумбияси провинциясида сикх сепаратистик ҳаракати етакчиси Ҳардип Сингх Нижарнинг ўлдирилишида Ҳиндистон расмийларининг қўли бор бўлиши мумкинлигини айтди.
Ҳардип Сингх Нижар Ҳиндистонда мустақил сикх давлати — Халистонни ташкил этиш тарафдори эди. Ҳиндистон ҳукумати уни террорчи деб ҳисоблаган. Нижар 18 июнь куни Канаданинг Ванкувер ҳудуди яқинида жойлашган Сарри шаҳридаги сикхлар ибодатхонаси ёнида ўлдириб кетилган.
Reuters агентлигининг хабар беришича, Трюдо 18 сентябрь куни парламентга фавқулодда мурожаат қилди ва унда Канада ҳуқуқ-тартибот идоралари Ҳиндистон ҳукумати агентлари ва Нижарнинг ўлими ўртасидаги потенциал боғлиқликка оид “ишончли даъволарни” қидираётганини айтди.
Агар Ҳиндистон расмийларининг қотилликка алоқадорлиги ҳақидаги тахминлар тасдиқланса, бу Канада “суверенитетининг бузилиш” бўлишини таъкидлади бош вазир.
Трюдонинг сўзларига кўра, у яқинда бўлиб ўтган G20 саммити доирасида Ҳиндистон бош вазири Нарендра Моди билан Нижарнинг ўлдирилиши ҳолатлари ҳақида шахсан гаплашган.
Ҳиндистоннинг қотилликка эҳтимолий алоқадорлиги ҳақидаги даъволар фонида Канада Ҳиндистон разведкасининг юқори мартабали ходимини ўз ҳудудидан чиқариб юборишини эълон қилди.
Ҳиндистон ТИВнинг жавоби
Ҳиндистон Ташқи ишлар вазирлиги мамлакатнинг Нижар ўлимига алоқадорлиги ҳақидаги тахминларни “абсурд” деб атади. ТИВ томонидан эълон қилинган баёнотда, бош вазир Моди Трюдо билан суҳбатда бу айбловларни “бутунлай рад этгани” таъкидланган.
“Биз Канада ҳукуматини ўз тупроғида ҳаракатланаётган барча антиҳинд унсурларига қарши зудлик билан ва самарали қонуний чоралар кўришга чақирамиз”, — деди Ҳиндистон ТИВ.
Ҳардип Сингх Нижар Ҳиндистонда туғилган, аммо сўнгги йилларда Канадада яшаган ва шу мамлакат фуқаролигини олган. 2018 йилда Ҳиндистон расмийлари Нижарни сикх сепаратистлари томонидан содир этилган кўплаб қотилликларга алоқадорликда айблади. У ўз айбини қатъиян рад этди.
Ҳиндистон Канадага юборган “террорчилар рўйхати”да Нижарнинг ҳам исми киритилган.
Изоҳ (0)