Буркина-Фасо разведка хизматлари давлат тўнтаришига уринишнинг олдини олди, деб хабар бермоқда мамлакат хунтаси, воқеа 26-сентябр куни содир бўлган.
Бир неча офицер ва бошқалар ҳибсга олинган, исёнга алоқадор қолган одамларни қидириш ишлари олиб борилмоқда.
“Ҳукумат айрим буркиналиклар, шу жумладан ўз ватанини ҳимоя қилишга қасамёд қилган офицерлар бундай саргузаштга аралашганидан чуқур афсусда”, — дейилади баёнотда.
Буркина-Фасода ўтган йили икки марта давлат тўнтариши содир бўлганди; ҳозирда мамлакатни капитан Иброҳим Траоре бошчилигидаги хунта бошқармоқда.
Дастлаб, январь ойида учинчи ҳарбий округ қўмондони (пойтахт Уагадугуни ўз ичига олади) Пол-Анри Дамиба ҳокимият тепасига келиб, фуқаролик давлат раҳбари Рока Каборени лавозимидан четлатган ва ҳибсга олганди. Амалдаги раҳбар Траоре аввалига янги ҳокимиятни қўллаб-қувватлаган, бироқ кейинчалик Дамибани террорчиларга қарши курашдан кўра кўпроқ сиёсат билан шуғулланганликда айблаган. Сентябр ойининг охирида Траоре бошчилигидаги бир гуруҳ ҳарбийлар Дамиба ағдарилганини эълон қилди. Ҳукумат тарқатиб юборилди, Конституция фаолияти тўхтатилди, чегаралар ёпилди. Ўша кунларда одамлар Россия байроқлари билан кўчаларга чиқишди.
Маълумот учун 2017 йилдан бери дунёда содир бўлган 17 давлат тўнтаришидан фақат биттаси Африкада эмас, Осиёда – Мянмада юз берган. Охирги уч йил ичида Ғарбий Африка давлатларида етти марта давлат тўнтаришига уриниш бўлган.
Изоҳ (0)