Нью-Йорк шаҳрида ўтаётган БМТ Бош Ассамблеяси 78-сессиясининг умумий мунозаралари доирасида Шавкат Мирзиёев ташкилот Бош котиби Антониу Гутерриш билан учрашув ўтказди. Бу ҳақда Президент матбуот хизмати хабар берди.
Қайд этлишича, учрашувда Ўзбекистоннинг БМТ билан ҳамкорлигини янада кенгайтириш истиқболлари, энг аввало, барқарор ривожланиш соҳасидаги миллий вазифа ва мақсадларни рўёбга чиқариш масалалари кўриб чиқилган.
Кейинги йилларда Ўзбекистон ва БМТ ўртасидаги ҳамкорлик мисли кўрилмаган юксак даражага чиққани мамнуният билан қайд этилди. Биргаликда қарийб 140 та дастур ва лойиҳалар муваффақиятли амалга оширилмоқда. Ўзбекистон ташаббуси билан БМТ Бош Ассамблеясининг 6 та резолюцияси қабул қилинди, Оролбўйи минтақаси аҳосилини ижтимоий қўллаб-қувватлаш учун махсус Trast фонди фаолият юритмоқда.
Ўзбекистон БМТнинг бир қатор нуфузли тузилмаларига сайланди ва уларнинг ишида фаол иштирок этмоқда. Биргаликда глобал кун тартибига оид, жумладан, озиқ-овқат хавфсизлигини таъминлаш, туризмни ривожлантириш, камбағалликка ва иқлим ўзгаришига қарши курашиш масалалари бўйича йирик халқаро тадбирлар ўтказилмоқда.
Антониу Гутерриш Ўзбекистон президентининг Бош Ассамблея 78-сессиясидаги нутқини юксак баҳолаб, мамлакатда амалга оширилаётган ортга қайтмас ислоҳотлар дастурини қўллаб-қувватлашини, давлат раҳбари долзарб глобал ва минтақавий муаммоларга ечим топиш борасида илгари сурган ташаббус ва таклифлар муҳим аҳамиятга эга эканини таъкидлади.
Бош котиб янги “Ўзбекистон – 2030” ислоҳотлар стратегиясига киритилган мақсад ва вазифларнинг кўламдорлигини, улар Барқарор ривожланиш мақсадлари билан тўлиқ ҳамоҳанглигини алоҳида қайд этди. БМТ ва унинг барча институтлари ушбу дастурий ҳужжатни амалга оширишга кўмаклашишга тайёрлигини билдирди.
Музокаралар якунида Ўзбекистон билан БМТ ўртасидаги кенг кўламли шерикликни чуқурлаштиришнинг устувор йўналишлари бўйича “йўл харитаси”ни ишлаб чиқишга келишиб олинди.
Маълумот учун, айни пайтда президент Шавкат Мирзиёев амалий ташриф билан АҚШда бўлиб турибди. Президент Шавкат Мирзиёев Бирлашган Миллатлар Ташкилоти Бош Ассамблеясининг 78-сессиясида нутқ сўзлади. Ундан олдин Шавкат Мирзиёев Нью-Йоркда Халқаро валюта фонди раҳбари ва Америка—Ўзбекистон савдо палатаси раиси билан учрашув ўтказгани тўғрисида хабар берилганди. Шунингдек, давлат раҳбари Европа кенгаши президенти Шарл Мишел билан Ўзбекистон билан Европа Иттифоқи ўртасидаги кўп қиррали ҳамкорликни, энг аввало, сиёсий, савдо-иқтисодий, инвестициявий ва гуманитар соҳаларда янада кенгайтириш масалалари кўриб чиқилди.
Изоҳ (0)