БМТ Бош Ассамблеясининг 78-сессияси тадбирлари доирасида Шавкат Мирзиёевнинг АҚШ президенти Жозеф Байден билан учрашуви бўлиб ўтди. Бу ҳақда Президент матбуот хизмати хабар берди.
Қайд этилишича, учрашувда икки томонлама муносабатлар ва минтақавий ҳамкорликнинг долзарб масалалари кўриб чиқилган. АҚШ президенти мамлакат мустақиллиги, суверенитети ва ҳудудий яхлитлигини ҳамда Янги Ўзбекистонда амалда оширилаётган ва муқаррар тус солган ислоҳотлар сиёсатини қатъий қўллаб-қувватлашини тасдиқлаган.
Шунингдек, АҚШнинг етакчи компания ва банклари билан амалий ҳамкорлик лойиҳаларини илгари суришга тўхталиб ўтилган.
“Ишбилармонлар билан ўтказилган икки томонлама учрашувлар ҳамда давлатимиз раҳбарининг АҚШга ташрифидан олдин ўтган бизнес форуми якунлари мамнуният билан қайд этилди”, — дейилади хабарда.
Бундант ташқари, инсон ҳуқуқлари, гендер тенглик соҳаларида ҳамда инсон фаровонлигини таъминлашнинг бошқа йўналишларида конструктив ҳамкорликни давом эттиришга алоҳида эътибор қаратилган.
Айни пайтда президент Шавкат Мирзиёев амалий ташриф билан АҚШда бўлиб турибди. Давлат раҳбари у ерда яшаётган ва ишлаётган бир гуруҳ ватандошлар ҳамда ушбу мамлакатнинг етакчи олий таълим даргоҳларида таҳсил олаётган “Эл-юрт умиди” жамғармаси стипендиатлари билан учрашди.
Изоҳ (0)