Ўзбекистонда букмекерлик хизматларини тарғиб қилувчи 27 та сайт блокланди

Ўзбекистонда букмекерлик хизматларини тарғиб қилувчи 27 та сайт блокланди. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси раиси ўринбосари Асадулла Қаюмов маълум қилди.

Унинг билдиришича, оммавий ахборот воситалари, интернет ва ижтимоий тармоқларда, ташқи реклама воситаларида жойлаштирилган (тарқатилган) рекламаларни қонунчилик ҳужжатларига мослиги юзасидан жами 24 мингдан ортиқ ўрганишлар ўтказилган. Булардан телевидениеда 308 та, радиода 247 та, ташқи реклама воситаларидаги 19 мингдан ортиқ, босма нашрларда 236 та, ва 4,5 мингдан ортиғи интернет ва ижтимоий тармоқларга тўғри келади. Ўрганишлар натижасида 8 мингдан ортиқ ҳолатда турли камчиликлар аниқланиб, уларни тезкор бартараф этиш чоралари кўрилган.

Ижтимоий тармоқларда 4 500 дан ортиқ рекламалар юзасидан ўрганишлар ўтказилган, шундан (Facebook — 144 та, Instagram — 344 та, Telegram — 4 108 та) қонунбузилиш ҳолатлари аниқланган ва бартараф этилган.

Шунингдек, унинг қайд этишича,  АОКА билан ҳамкорликда рекламага оид қонунбузилишларга нисбатан тезкор чоралар кўриш мақсадида букмекерлик хизматларига оид рекламани тарғиб қилувчи сайтларга киришни блоклаш чоралари кўрилмоқда. Шундай хизматларни тарғиб қилувчи 92 та сайтни блоклаш бўйича АОКАга таклифлар киритилган, шундан 27 та сайт блокланган.

Ижтимоий тармоқларда эстрада юлдузлари, спортчилар ва блогерлар томонидан тотализаторлар ва букмекерлик хизматларини реклама қилиш ҳолатлари бўйича ички ишлар органларига 11 та хат киритилган.

Эслатиб ўтамиз, президент қарори билан махсус ишчи гуруҳ ташкил қилинган ҳолда 2023 йил якунига қадар илғор хориж тажрибаси асосида футболни молиялаштириш тизимини кенгайтиришда букмекерлик фаолиятини амалга ошириш бўйича таклифларни Вазирлар Маҳкамасига киритиш белгиланган.