Яккасаройдаги ўзбошимчалик оқибати: дарахтлар кимёвий модда билан қуритилди, автомобиль йўли ва пиёдалар йўлакчаси эгаллаб олинди 

Тошкент шаҳрининг Яккасарой тумани “Тўқимачи” маҳалласи Сафдош кўчасида яшовчи аҳоли ҳудуддаги автомобиль йўли, пиёдалар йўлакчаси ва дарахтзор эгаллаб олиниб, савдо комплекси қурилаётганидан норози бўлмоқда. “Дарё” аҳоли мурожаати асосида муаммони воқеа жойига бориб ўрганди.

Маълум бўлишича, ҳудуддаги ер аукцион савдо орқали Перфеcт универсал сервиcе МЧЖга 852 миллион сўмга сотилган.

Туман ҳокими бошчилигидаги сектор раҳбарлари 2022 йилнинг август ойида биз яшаётган кўп қаватли уй ёнидаги автомобиль йўли, пиёдалар йўлакчаси ва дарахтзорларни ноқонуний равишда аукцион савдосига чиқариб, сотиб юборган экан. Ваҳоланки, биз — шу ерда яшовчи аҳоли вакиллари туман ҳокими ҳамда ҳукумат идораларига мурожаат қилиб, қаровсиз ерларни овоқа сув кетадиган жой, болалар учун оромгоҳ, кексалар учун ўтирадиган жой қилиб беришларини сўраб, келардик. Шахсан Яккасарой ҳокими ва прокурор ваъда берганди. Лекин не кўз билай кўрайликки, бу жойлар ноқонуний сотиб юборилибди. Номаълум тадбиркорлар биз яшаётган уй ёнига келиб, ўсиб турган дарахтларни ўлдириб, зўравонлик билан атрофни ўраб олиб, қурилиш ишларини бошлаб юборди, — дейди мурожаатчи Муҳиддин Бозоров.

Мурожаатчига кўра, тадбиркор кўп қаватли уй ёнидаги автомобиль йўли, пиёдалар йўлакчасини эгаллаб олиб, айнан шу ердан савдо комплекси қурмоқчилигини билдирган. 

Биз бунга қаршилик қилганимиз ва туман ҳокимлиги-ю, масъул ташкилотларга мурожаат қилганимиздан сўнг, мутахассислар келиб ўрганишяпти. Аммо ҳозирча тайинли жавоб беришмади, — дейди у. 

Кўп қаватли уйда яшовчи Наргиза Исаева маҳалладаги дарахтзор ўрнида қурилиш бўлаётганини айтиб, ҳудуд аукцион савдога қўйилганидан ҳайратдалигини билдирмоқда. Шунингдек, у шахсан президент Шавкат Мирзиёев ҳам табиатни асрашга чақираётганини эслатиб, нафақат Тошкентда, Ўзбекистонда ҳам экологик вазият яхшимаслигини, шу сабаб экологияни, дарахтларни асраб қолишга ҳаракат қилиш лозимлигини айтмоқда.

Суҳбатдош ҳудуддан қурилаётган савдо офиси ҳар қандай ҳолатда ҳам қонуний ҳужжатларга тўғри келмаслигини, тадбиркор қонуний қурилиш олиб борса, аҳолининг бунга ҳеч қандай эътирози йўқлигини таъкидламоқда. 

Яна бир суҳбатдош Гулсара Ҳаққулова ҳам ушбу ҳудуддан қурилаётган қурилиш ишлари ноқонуний эканини таъкидлаб, “Ўтган куни шу жойда бир болани машина уришга сал қолди”, дейди.

Суҳбатдош ҳокимликдан бу ноқонуний ишга асос сўралганида, улар бу ҳақида аукцион савдони ўтказган масъуллар билишини, улардан сўраш кераклигини айтганини билдирди.

Ер аукцион савдога чиқишидан олдин, бу ерда нима бор, бўшми деган маълумотларни ҳокимият ва ҳокимият тизимидаги ташкилотлардан олади-ку, улар Яккасарой туманининг Сафдош маҳалласида шунақа жой борлигини қаердан билади?,  дейди у.

“Дарё” мухбирининг аниқлаштиришича, туманнинг Сафдош кўчасидаги мазкур ер майдонини аукционга қўйиш ташаббуси 2022 йилнинг 25 май куни Қурилиш ва уй-жой коммунал хўжалиги вазирлиги томонидан Нодир Фахритдинович исмли ташаббускор томонидан илгари сурилган. Тўғрироғи ариза берилган. Ўша куни Яккасарой ҳокимлиги томонидан буюртма берилиб, Давлат кадастрлар палатасига текширишга юборилган. Шундан сўнг Ички ишлар вазирлиги, Санитария эпидемиологик назорат марказлари ва ҳатто Экология, атроф-муҳитни муҳофаза қилиш ва иқлим ўзгариши вазирлиги томонидан маъқулланиб, савдога чиқиб кетган.

Ўзини Жасур деб таништирган тадбиркорга кўра, у ерни аукцион савдодан сотиб олганига 9 ойдан ошган. Аммо у бу ерда қурилиш қилолмаяпти. 

Биз бу ерни сотиб олиб, пулимиз музлаб қолаётгани сабаб жабрланяпмиз. Шу сабаб бу ҳолатга аниқлик киритиш учун аҳолига бизни судга беришни таклиф қилдик. Бизга ҳам пулимизни қайтариб беришса, бош оғриғидан ҳам қутиламиз. Одамларни норози қилиб, бирор нарса қурмаймиз. Агар қурилишни ҳам ўз вақтида бошламасак, бу ҳам бекор бўлиб кетади. Шу сабаб бизга ҳам ечим керак, — дейди тадбикор.

Тадбиркор онлайн савдодан сотиб олган 140 метр/квадрат ер майдонида 2023 йилнинг октябрь ойига қадар қурилиш ишларини бошламаса, аукцион натижалари бекор бўлиб, ер учун тўланган пулга куйиб қолишини айтмоқда. 

Аҳоли вакиллари эса ер ноқонуний сотилганини, ҳокимлик вакиллари масъул ташкилотларни ҳудудга олиб келиб, сотилган ер майдони қонуний сотилган бўлса, шуни асослаб беришини сўрамоқда. 

Аукционда дарахтзорлар сотилиши мумкинми, канализация, оқова сув ўтган жой сотилиши мумкинми? Шу саволимизга жавоб сўрасак, судга беринг дейишади. Нега биз бошқалар хатоси сабаб, судма-суд сарсон бўлишимиз керак, — дейди мурожаатчилар.

Аҳоли вакилларининг журналистларга билдиришича, аукционда сотилган ҳудудда ўсиб турган дарахтларни қасддан ўлдиришга уринишлар бўлган. 

Яккасарой ҳокимлиги дарахтзорларни аукционда сотгач, номаълум шахслар бу ҳудуддаги дарахтлар тагига кимёвий модда қуйиб, уларни қасддан ўлдиришга уринган. Бу ҳақда экспертиза хулосаси ҳам бор. Қолаверса, экология ходимлари ҳам буни тасдиқлайди. Биз бу ҳолат аниқлангач, ҳужжатларни Бош прокуратурага ҳам тақдим қилдик, — дейди Муҳиддин Бозоров.

Мурожаатчининг қўшимча қилишича, ҳолат ҳақида Бош прокуратурага шикоят қилингач, дарахтларни қасддан нобуд қилишга уринган номаълум шахсларга маъмурий чора кўрилиши айтилган. 

Шу ҳудудда яшовчи Гулсара Ҳаққулованинг билдиришича, дарахтлар тагига оппоқ суюқлик қуйилганини кўришган. 

Ўтган куни дарахтлар тагида оқ суюқлиқ қуйилганини кўрдик. Кейин дарахтлар барги тўкилиб, қурий бошлади. Айбдорларга чора кўрилдими ёки йўқми бундан бехабарман, — дейди суҳбатдош. 

Яккасарой туман Экология бўлими ходими Миркомил Абдувоҳидовнинг маълумот беришича, ҳудуддаги 7 та дарахт тагига оқ суюқлик қуйилгани, суюқлик таркибида нефть маҳсулотлари борлиги аниқланган. Шу сабаб ушбу жойни аукциондан сотиб олган шахсга нисбатан маъмурий баённома расмийлаштирилиб, судга тақдим қилинган.  

Аҳоли вакилларидан бири Дилдора Аҳмедованинг қўшимча қилишича, аукционда дарахтзорларни сотиб олган тадбиркорга ер ўлчаб берилаётганда автомобиль йўли ва пиёдалар йўлакчасидан ўлчаб берилган. Бу эса нафақат аҳолининг тадбиркорнинг ҳам эътирозига олиб келган.

“Дарё” воқеалар ривожини кузатишда давом этади.