Chevrolet Captiva-5 октябрь ойи якунида сотувга чиқарилиши мумкин. Бу ҳақда “Ўзавтосаноат” вакили “Дарё”га маълум қилди.
Манбага кўра, ҳозирда янгиланган Chevrolet Captiva синовдан ўтказилмоқда.
“Агар тест жараёни муваффақиятли ўтса, Captiva-5 октябрь ойи охирида сотувга чиқарилади. Автомобиль нархи эса сотув бошланишидан аввал эълон қилинади”, — дея таъкидлади компания вакили.
Қўшимча қилинишича, автомобиллар Хитойдан олиб келинади.
Эслатиб ўтамиз, UzAuto Motors Captiva-5 автомобиллари сотувини 2021 йил ноябрда тўхтатганди. Бунга сабаб сифатида дунёда яримўтказгич микрочип инқирози юза бераётгани келтирилган. Компания ўша йилнинг сентябри якунида янгиланган Chevrolet Captiva сотуви бошланганини эълон қилганди. Мазкур русумдаги автомобиллар нархлари қуйидагича бўлган:
- бошланғич LT комплектация — 192 775 000 сўм;
- LT комплектация 5 ўринли —238 086 957 сўм;
- LT комплектация 7 ўринли — 244 782 609 сўм ;
- Premier комплектация 7 ўринли — 269 478 261 сўм.
Компания хабарида ушбу нархлар ҚҚСсиз кўрсатилган. UzAutoSavdo тизимида эса ҚҚС билан қўшиб ҳисоблаганда, Premier комплектация 309 900 000 сўмдан, LT 7 эса 281 500 000 сўмдан бошланиши қайд этилган, бошланғич LT ва LT 5 комплектациялари нархлари эса келтирилмаган.
Маълумот учун, Captiva модели Ўзбекистон бозорига 2007 йилда кириб келган. Ўша йилнинг октябрида мамлакатда автомобилни йиғиш йўлга қўйилган. 2011 йилнинг сентябри ва 2017 йилнинг февралида модел янгиланган. 2018 йилнинг сентябрида эса GM’нинг глобал стратегиясига мувофиқ уни ишлаб чиқариш тўхтатилган.
Изоҳ (0)