Умра-2023 мавсумининг навбатдаги босқичи бугун, 14 сентябрь куни бошланди. Бу ҳақда Мусулмонлар идораси ахборот хизмати хабар берди.
Унга кўра, 14 сентябрь куни Умра-2023 мавсумининг навбатдаги босқич илк гуруҳ зиёратчилари Тошкент халқаро аэропортидан Саудия Арабистонига жўнаб кетди. Ҳар 3 кунда бир маротаба амалга ошириладиган авиақатнов мамлакатдан Саудия Арабистонига йўл олади. Зиёратчилар Мадина шаҳрида 3 кун, Макка шаҳрида эса 7 кун бўлади.
Мавсум давомида тажрибали ишчи гуруҳи ва имом-хатиблардан иборат гуруҳ раҳбарлари (элликбоши) ҳамда малакали шифокорлар юртдошларга хизмат кўрсатади. Зиёратчилар Мадинада “Sarayа Ҳармоний”, Макка шаҳрида эса “Олян Мааси” сингари замонавий меҳмонхоналарда истиқомат қилишади. Меҳмонхоналарда 3 маҳал иссиқ овқат, ширинлик ва сархил мевалар тортиқ қилинади.
Умра ибодатини адо этувчилар 10 кун мобайнида икки ҳарамда тоат-ибодат билан машғул бўлиш билан бирга, Макка ва Мадина шаҳарларида муқаддас қадамжоларни ҳам зиёрат қилишади.
Вазирлар Маҳкамасининг 2023 йил 8 августдаги 345-сонли “Умра тадбирларини ташкил этиш ва ўтказишда зиёратчиларнинг манфаатларини самарали ҳимоя қилиш бўйича қўшимча чора-тадбирлар тўғрисида”ги қарори қабул қилинган эди.
Қўмитанинг қайд этишича, шу кунларда ижтимоий тармоқ саҳифаларида мазкур қарордаги айрим жиҳатлар бўйича шахсий қарашларга асосланган нотўғри талқинлар тарқалмоқда.
“Аслида мазкур қарор асосида эндиликда мамлакатимизда хусусий сектор томонидан умра тадбирларини ташкил этиш ва амалга ошириш имконияти яратилаётгани келтирилган”, — дейилади муносабатда.
Унга кўра, туристик фаолиятни амалга ошириш лицензияси чиқиш туризми кичик турининг умра хизматларини кўрсатиш фаолияти бўйича қуйидаги қўшимча лицензия талаблари ва шартлари жорий этилади:
- 100 минг АҚШ долларидан кам бўлмаган маблағларни Туризм қўмитасининг Хавфсиз туризм жамғармасига захира қилиб қўйиш;
- умра хизматлари давомида зиёратчиларнинг гуруҳ раҳбари этиб Ўзбекистон мусулмонлари идораси билан тузиладиган шартнома асосида унинг диний билим ва кўникмаларга эга бўлган мутахассисларини тайинлаш;
- умра хизматларини кўрсатувчи туроператор штатида диний (исломий) таълим йўналишлари бўйича республика таълим муассасаси ёки Ўзбекистон халқаро ислом академиясининг тегишли бакалавриат таълим йўналиши ёхуд магистратура мутахассислиги битирувчиси бўлган камида бир нафар мутахассиснинг бўлиши;
- умра хизматларини вояга етмаган фуқароларга кўрсатмаслик;
- умра хизматларини Саудия Арабистони подшоҳлигидаги ҳамкор ташкилот ўртасида имзоланадиган шартномага мувофиқ амалга ошириш.
2023 йил 1-октябрдан умра хизматларини кўрсатувчи туроператорлар фаолиятини рейтинг асосида баҳолаш тизими жорий этилади. Баҳолаш тизими Туризм қўмитасининг махсус сайтида эълон қилиб борилади.
Қарорда белгиланган қўшимча лицензия талаб ва шартлари 2023 йил 1 ноябрдан қўлланади.
“Қарордаги умра хизматларини вояга етмаган фуқароларга кўрсатиш тақиқланиши қатъий белгилаб қўйилган бўлса-да, бироқ мазкур жиҳатни турли ассоциация ва ваколатга эга бўлмаган шахслар томонидан шахсий қарашга асосланган ҳолда нотўғри талқин қилиниши — одамларни чалғитишга сабаб бўлмоқда. Аслида Вазирлар Маҳкамасининг 2023 йил 8 августдаги 345-сонли қарорига мувофиқ умра хизматларини вояга етмаган фуқароларга кўрсатиш тақиқланади.
Ўз навбатида, мазкур қарорни шарҳлаш ва шахсий қарашни оммага сингдириш турли ассоциация ва шахсларнинг ваколатига кирмаслигини маълум қиламиз”, — дея таъкидланади муносабатда.
Аввалроқ Ўзбекистон фуқаролари Саудия Арабистонига электрон виза олиш имконига эга бўлгани тўғрисида хабар берилганди. Ушбу виза билан йил давомида умра ҳамда мамлакат бўйлаб саёҳат қилиш мумкин бўлиб, амал қилиш муддати 90 кунни ташкил қилади.
Изоҳ (0)