Шавкат Мирзиёев Эмомали Раҳмон таклифига биноан 14 сентябрь куни амалий ташриф билан Тожикистонга жўнаб кетганди. Давлат раҳбари Душанбега ташрифини Тожикистон президенти билан учрашувдан бошлади.
Президент матбуот хизматининг хабар қилишича, Шавкат Мирзиёевни Душанбе аэропортида Тожикистон бош вазири Қоҳир Расулзода ва бошқа расмий шахслар кутиб олди.
Шундан сўнг Ўзбекистон етакчиси Тожикистон президенти билан музокара ўтказди.
Қайд этилишича, музокараларда Ўзбекистон билан Тожикистон ўртасидаги стратегик шериклик ва иттифоқчилик муносабатларини янада мустаҳкамлашнинг долзарб масалалари муҳокама қилинди.
Олий даражадаги келишувлар ижросининг амалий жиҳатларига, энг аввало, иқтисодиётнинг устувор тармоқларида кооперация лойиҳаларини илгари суриш ва маданий-гуманитар алмашинув дастурини кенгайтиришга алоҳида эътибор қаратилди. Бу борада қўшма Ҳукуматлараро комиссия самарали фаолият олиб бораётгани мамнуният билан қайд этилди.
Учрашувда давлат раҳбарлари Марказий Осиё мамлакатлари етакчиларининг навбатдаги Маслаҳат учрашуви ва Оролни қутқариш халқаро жамғармаси саммити кун тартибига киритилган масалалар юзасидан ҳам фикр алмашган. Минтақавий ҳамкорликнинг бошқа жиҳатлари ҳам кўриб чиқилган.
Ташриф дастурига мувофиқ Душанбеда Марказий Осиё мамлакатлари етакчиларининг навбатдаги Маслаҳат учрашуви ва Оролни қутқариш халқаро жамғармаси таъсисчи давлатлари раҳбарларининг йиғилиши бўлиб ўтади.
Бу саммитларда президент қатор муҳим ва долзарб таклиф ҳамда ташаббусларни илгари суриши, минтақада савдо-иқтисодий, транспорт-логистика алоқаларини, “яшил” иқтисодиёт ва энергетика, сув ва экология соҳаларида ҳамкорликни янада мустаҳкамлаш, иқлим ўзгаришларининг салбий оқибатларига қарши биргаликда курашиш каби масалалар юзасидан ўз нуқтаи назарини баён қилиши кутилмоқда.
Изоҳ (0)