“Дарё”да Тошкент шаҳрининг Яшнобод туманида 9 та хонадондан иборат уч қаватли уй 39 нафар кишига пуллангани билан боғлиқ фирибгарлик ҳолати очиқланганди. Бош прокуратура ахборот хизматининг хабар беришича, ҳолат юзасидан прокуратура органлари томонидан терговга қадар текширув ҳаракатлари ўтказилмоқда.
“Дарё.уз” интернет нашрида Яшнобод туманидаги уй-жой билан боғлиқ фирибгарлик содир қилингани ҳақида мақола эълон қилинган. Мазкур ҳолат юзасидан Тошкент шаҳар прокуратура органлари томонидан терговга қадар текширув ҳаракатлари ўтказилмоқда. Мақолада кўрсатилган ҳолатлар тўлиқ, холисона ўрганилиб, якуни бўйича қонуний қарор қабул қилинади, — дейилади Бош прокуратура ахборотида.
Маълум қилинишича, текшириш якуни бўйича қўшимча маълумот берилади.
Биз фирибгарлик қурбони бўлдик. Zohmir Group номли қурилиш компанияси томонидан алдандик. Бу компаниянинг рекламасига чув тушдик. Янги уйларга инвестиция киритинг, яхши уйларга эга бўласиз, дейишганига уларга ишониб, пулларимизни нотариус орқали топширгандик. Шартномалар қилинди, кимдир пулини банк орқали тўлади, яна кимдир нотариус орқали қарз шартномалари қилиб, нақд шаклда тўлов қилди. Яна бошқа биров қурилиш молларига пул тикиб, уйга шу тарзда инвестиция киритди, — деганди қурилиш ташкилотига алданганини айтган мурожаатчилардан бири Аваз Ёрмуҳаммедов.
Маълум бўлишича, Zohmir Group номли қурилиш компанияси шаҳарнинг Яшнобод туманидаги янги қурилаётган 9 та хонадондан иборат уч қаватли уйларини 39 нафар фуқарога пуллаган.
Қурилиш ташкилоти бизга ваъда қилган уйларни 2022 йилнинг май—июнь ойида топшириши керак эди. Лекин 2023 йил келди ҳамки, уй қурилиши қандай ҳолатда бўлса, шундай турибди. Ҳеч нарса ўзгармаган. Биз айтилган муддатдан ўтгач, қурувчидан уйимиз қани, қачон тайёр бўлади, деб сўраганимиздан сўнг, бошқа қизиқ-қизиқ муаммолар пайдо бўлмоқда. Аниқланишича, бизга сотилган уйлар яна 4-5 кишига сотилган экан, деганди “Дарё” журналисти билан суҳбатлашган мурожаатчилар.
Изоҳ (0)