Иқтисодий тадқиқотлар ва ислоҳотлар маркази ўзининг навбатдаги шарҳида кўчмас мулк бозорида юз берган ўзгаришларни таҳлил қилди.
Қайд этилишича, август ойида кўчмас мулк савдоси 12,8 фоизга ўсган, рўйхатга олинган олди-сотди битимлари сони 28 мингтани ташкил этган. Бу бир ой олдинги кўрсаткичга нисбатан деярли 3 мингтага кўп.
“Сўнгги икки ой ичида пойтахт уй-жой бозорида фаоллик нисбатан паст бўлса-да ўсаётганини кўриш мумкин. Шундай қилиб, август ойида савдо ҳажми 10 фоизга ошди ва 7,5 минг хонадонни ташкил этди”, — дейилади хабарда.
Пойтахтда квартирани ижарага олиш Учтепа (7,1 доллар), Сергели (6,7 доллар) ва Бектемир (5,6 доллар) туманларида энг мақбул нарх бўлиб қолмоқда.
Иккиламчи кўчмас мулк бозорида биринчи марта йил бошида квартиралар нархининг пасайиши кузатилган. Август ойида уй-жойларнинг квадрат метри учун ўртача нарх 0,7 фоизга пасайган бўлса, ўтган йилга нисбатан иккиламчи уй-жойлар нархи 22 фоизга ошган.
Ўтган йилнинг август ойига нисбатан Тошкент шаҳрида иккиламчи уй-жойларнинг ўртача нархи 31,6 фоизга ошган.
Бундан олдин Тошкент вилоятида 4 176 та кўчмас мулк манзили ўзгаргани, Тошкент вилоятида президент совғаси сифатида берилган уй бошқа шахсга расмийлаштирилгани, Ўзбекистонда 3 минг гектар ер ўзбошимчалик билан эгаллаб олингани тўғрисида хабар берилганди.
Изоҳ (0)