Бухоро вилоятининг Бухоро шаҳридаги кўп қаватли уй қурилишида ишлаётган фуқаролар автокран илгагидаги бункердан йиқилиб тушиши оқибатида вафот этди. Бу ҳақда хабар берган “Дарё” манбасига кўра, воқеа 2023 йилнинг 5 сентябрь куни содир бўлган.
Вилоят прокуратураси ахборот хизмати раҳбари Бекзод Шариповнинг “Дарё”га қўшимча қилишича, автокран бункеридан йиқилиб тушганлар икки киши бўлган.
2023 йилнинг 5 сентябрь куни Бухоро шаҳар ИИО ФМБ 102 навбатчилик қисмига соат 17:57 да Absolute Elite Building МЧЖга тегишли бўлган Бухоро шаҳар “Низомий Ганжавий” МФЙ ҳудудида қурилаётган кўп қаватли уйнинг қурилишида икки нафар ёлланма ишчи тан жароҳати олганлиги тўғрисида хабар келиб тушган. Хабарга асосан Бухоро шаҳар ИИО ФМБ ТБ тезкор-тергов гуруҳи томонидан ҳодиса содир бўлган жой кўздан кечирилган, — дейди Бекзод Шарипов.
Дастлабки тўпланган ҳужжатларга кўра, кўп қаватли уй қурилишида ёлланма ишчи сифатида ишлаб келган фуқаролар — қашқадарёлик А.И. ҳамда Н.Қ. бўлган.
Юк кўтариш учун мўлжалланган автокраннинг илгагига осилган бункерга кириб бинонинг 8-қавати фасад қисмини суваётган 21 ёшли фуқаролар автокран бункери бино деворига тегиб, илгаклари узилиши натижасида ерга йиқилиб, оғир тан жароҳати олган. Улар Республика шошилинч тез ёрдам илмий маркази Бухоро филиалининг қайта жойлантириш бўлимида вафот этган, — дейди Бекзод Шарипов.
Изоҳ (0)