Тошкент ҳавоси “зарарли” даражада экани аниқланди

Тошкент шаҳрида бугун, 11 сентябрь куни чангли ҳаво кузатилмоқда. Ҳаво бўйича “Ўзгидромет” кузатув натижалари эълон қилинди.

Унга кўра, Тошкент шаҳрида айни вақтда (16:00-17:00) ҳавонинг майда чанг зарралари (RМ 2,5) билан ифлосланиши қуйидагича:

• Юнусобод тумани “Бодомзор” йўлида – 133 мкг/м3; 
• Чилонзор тумани “Халқлар дўстлиги” майдонида –171 мкг/м3. 

Ушбу ҳудудларда ҳаводаги чанг миқдори AQI – RМ 2,5 кўрсаткичи бўйича ҳавонинг “зарарли” даражадаги ифлосланиш тоифасига киради. 

11 сентябрь куни соат 15:00 ҳолатига кўра, пойтахт ҳавоси дунёнинг йирик шаҳарлари орасида ифлосланиш рейтингида 7-ўринни эгаллади. Тошкент шаҳар ҳокимлиги кучли чангли шамол вақтида машиналарни дарахтлар тагида қолдирмасликни сўради. Санепидқўмита чангли ҳавода қилиш керак бўлган қатор тавсиялар берди.

Хусусан, ҳаво таркибидаги чанг зарралари уйлар, ишхоналар, автомобилларнинг эшик-деразаларидан сизиб кириб, ёпиқ хоналар ҳавосини ҳам чанг заррачалари билан ифлослантириши мумкинлиги айтилган. Мазкур ҳаво шароитида қуйидагиларни қилиш керак:

• Кўчага иложи борича камроқ чиқиш;
• Ишга, ўқишга, харид учун кўчага чиққанда тиббий ниқоб тақиш ва ҳар 2 соатда алмаштириш;
• Кўчадан уйга қайтгач душ қабул қилиш (соч ва юз-кўзларни яхшилаб ювиш);
• Калит, кўзойнак, телефон ва сумкани намланган салфетка билан яхшилаб артиш;
• Кўчага кийиб чиққан кийимларни ювиш; 
• Устки кийимларни (костюм, плаш, палто ва бошқалар) маска таққан ҳолда ташқарида яхшилаб қоқиш;
• Ним таъсир этувчи тузли сув билан томоқ ва бурунларни тез-тез чайиш;
• Кўпроқ суюқлик (илиқ) ичиш, иложи бўлса кўк чой, наъматак дамламасини ичиш;
• Ёғли, қовурилган, дудланган, тузланган, шўр, аччиқ таомларни чеклаш; 
• Суюқ сабзавотли таомлар, сут ва сут маҳсулотлари (қатиқ, кефир ва бошқалар), кўкатларни истеъмол қилиш;
• Чанг кўп тўпланишининг олдини олиш ва уйни ҳамда юзаларни тўғри тозалаш керак;
• Уй, ишхона ва машина эшиклари ва деразаларини зич ёпиш;
• Чанг йиғилиши мумкин бўлган ҳамма нарсаларни чангюткич ёрдамида тозалаш керак (ковролин, гилам, юмшоқ мебел, юмшоқ ўйинчоқлар ва бошқалар). Юмшоқ мебелни қоқишдан аввал усти намланган латта билан ўралиши тавсия этилади.
• Чанг йиғилиши мумкин бўлган барча юзаларни (пол, шкаф, ишчи юзалар ва бошқалар) кун давомида бир неча марта намланган латта билан яхшилаб артиш керак;
• Оёқ кийимларни эшик олдида қолдириш ва имкон қадар тезроқ ювиб қўйиш керак;
• Хона ҳавоси оптимал намлигини таъминлаш: ҳўл сочиқларни хоналарга осиш, каттароқ сиғимли идишларга сув солиб қўйиш.

“Нафас йўли сурункали касалликлари бор юртдошларимизга чангли ҳавода ташқарига чиқмасликни тавсия қиламиз”, — дейилади хабарда.