Veolia Energy Tashkent Чилонзор туманида тармоқ қувурларини ўтказиш ишлари амалга оширилаётганини маълум қилди.
Қайд этилишича, иситиш мавсумига тайёргарлик доирасида Чилонзор тумани Муқимий кўчаси бўйлаб тармоқ қувурларини ўтказиш ишлари бошланган.
Тамирлаш ишлари давомида 10 сентябрдан 5-октябргача Муқимий кўчаси қисман тўсиб қўйилади. Қувурларни кўчиришдан ташқари (ҳар бирининг диаметри 700 миллиметр ва умумий узунлиги 1 километр) зулфинлар ва баъзи ускуналар ҳам алмаштирилади.
Иш истеъмолчиларга иссиқ сув таъминотини чекламасдан амалга оширилади. Шу билан бирга, 11-15 сентябрь кунлари “Тошкент ИЭМ” (“ИЭС” АЖ филиали) режалаштирилган таъмирлаш ишлари доирасида Veolia Energy Tashkent компаниясига иссиқ сув беришни тўхтатган.
“Шундай қилиб, 11-15 сентябрь кунлари Муқимий кўчасида иссиқ сувнинг йўқлиги Тошкент ИЭМ нинг режали тўхташи билан боғлиқ бўлади”, — дейилади хабарда.
“Veolia Energy Tashkent” МЧЖ ХК вақтинчалик ноқулайликлар учун олдиндан узр сўрайди ва белгиланган муддатларда режалаштирилган ишларни бажариш учун ўз томонидан зарур чораларни кўради.
Эслатиб ўтамиз, Тошкент шаҳрининг Мирзо Улуғбек туманида 21 августдан бошлаб иссиқ сув беш кунга ўчирилган эди. Ўшанда Veolia Energy Tashkent компанияси иситиш мавсумига тайёргарлик доирасида зулфинларни алмаштирган.
Изоҳ (0)