1997 йилнинг 31 августида малика Диана вафот этди. Бу фожиали воқеа бутун дунёни ларзага солди. Диананинг ҳаёти эртакка унчалик ўхшамасди (гарчи бир пайтлар у шундай туюлган бўлса-да): муваффақиятсиз никоҳ, қироллик оиласининг босими ва папарацциларнинг доимий таъқиби маликани чарчатарди. Бироқ уни бутун дунёдаги мухлислар қўллаб-қувватлади. Кўпчилик Диананинг қандай инсон эканлигига қизиқарди. Бу саволга нафақат шаҳзода Уилям ва Гаррининг онасининг биографлари, балки режиссёрлар ҳам жавоб беришга ҳаракат қилган. Қуйида малика Дианани яқиндан билиб олишга ёрдам берадиган фильмлар ҳақида маълумот берилади.
“Диана: Унинг ҳақиқий ҳикояси” — 1993 йил
Ушбу фильм малика Диана тирик пайтида чиқарилган. Лойиҳада бош ролни Серена Скотт Томас ўйнади ва Эндрю Мортоннинг худди шу номдаги китоби асос қилиб олинди. Фильм Чарльз ва Диана ўртасидаги муносабатларга, маликанинг беқарор руҳий ҳолатига қаратилган. Кинокартина ҳақида аниқ хулоса берилмаган, бироқ танқидчилар жуфтликнинг душманлиги жуда реал тарзда намоён бўлганини таъкидлаган.
“Ошиқ малика” — 1996 йил
Ушбу кинокартина ҳам малика ҳаёт бўлганида чиқарилган. Фильм Анна Пастeрнакнинг асари асосида яратилган, унда маликанинг капитан Жеймс Хюитт билан ишқий муносабатлари ҳақида ҳикоя қилинади. Бойлик ҳис-туйғулардан устун бўлиб чиқди — Жеймс Диана билан бўлган муносабатлари ҳақидаги маълумотларни матбуотга сотишга қарор қилди. Бу кинокартина ҳам томошабинлар томонидан турлича қабул қилинган. Масалан, калта бўйли қорамағиз бўлган бош актриса Жули Коксни кўпчилик ёқтирмасди.
“Қиролича” — 2005 йил
“Қиролича” фильми қироллик оиласи малика Диананинг ўлимини қандай бошдан кечиргани ҳақида ҳикоя қилади. Сюжет Елизавета II атрофида содир бўлади, у вазиятдан узоқлашишга ва фожианинг тўлиқ кўламини тушунишга ҳаракат қилади — бунинг учун у Balmoral қалъасида ёлғиз яшашга қарор қилади. Бу ҳолатга нисбатан жим турган қироличани кўрган инглизлар ғазабланади ва бош вазир Тони Блер қироличани оммавий мотам маросимини ўтказишга кўндиришга ҳаракат қилади. Фильмда собиқ рафиқаси вафотидан кейин Чарльзнинг қариндошлари бошдан кечирган бефарқлик ва енгил муносабат кўрсатилган.
“Диана: Маликанинг сўнгги кунлари” — 2007 йил
Ушбу фильмнинг сюжети малика Диана ҳаётининг сўнгги ойларига қаратилган. Ҳужжатли драма маликанинг ўзига яқин инсонлари билан суҳбатларини, шунингдек, воқеаларнинг бадиий қайта қурилишини ўзида акс эттиради. Ушбу кинокартина жуда ишонарли бўлиб чиқди, чунки ижодкорлар малика Дианани идеализация қилмади, унинг камчиликларини, жамоатчиликни рози қилиш истагини, севгига бўлган эҳтиёжини ва манипуляция қилиш қобилиятини кўрсатди. Тўғри, бу муаллифнинг ихтиросисиз содир бўлиши мумкин эмас эди. Масалан, Диананинг Доди Ал-Файед билан суҳбатлари нима мавзуда бўлгани аниқ эмас.
“Диана: Муҳаббат ҳикояси” — 2013 йил
Фильм малика ҳаётининг сўнгги икки йили ҳақида ҳикоя қилади. Малика Диананинг ажралиши ҳам, унинг хайрия фаолияти ҳам ҳаётига таъсир қилади. Бу даврда у Анголага боради ва миналарга қарши кампанияни тарғиб қилади. Шу билан бирга, Диана кардиожарроҳ Ҳаснат Хон, кейинроқ Доди Ал-Файед билан муносабатларни бошлайди. Лойиҳада бош ролни Наоми Уотц ижро этган.
“Спенсер” — 2021 йил
Ушбу лойиҳа малика Диана қироллик оиласи билан ўтказган Сандригемдаги Рождество байрамлари ҳақида ҳикоя қилади. Бироқ бу ҳикояда у ўзини бегонадек ҳис қилади, унинг ягона тасаллиси ўғиллари эди. Режиссёр Пабло Ларрейн малика Диана ролида фақат Кристен Стюартни кўрган. Сюжет бош қаҳрамоннинг ҳис-туйғулари ва кечинмаларига қаратилган бўлиб, у турмуши ҳалокатга учраганини тобора кўпроқ англаб боради.
Изоҳ (0)