Экология, атроф-муҳитни муҳофаза қилиш ва иқлим ўзгариши вазири маслаҳатчиси Расул Кушербаев ўзининг Telegram каналига пойтахтнинг Олмазор туманида дарахтлар дрель ёрдамида тешилиб, қуритилаётгани айтилган видеони жойлаштирган эди. Экология вазирлиги ҳолат юзасидан маълумот берди.
Унга кўра, Экология, атроф-муҳитни муҳофаза қилиш ва иқлим ўзгариши вазирлиги, Тошкент шаҳар Экология бошқармаси Олмазор тумани бўлими давлат инспекторлари томонидан мурожаат ўрганилди. Ўрганиш натижасида Airport House Builders МЧЖга тегишли бўлган ҳудудда жами 19 туп манзарали дарахтга қасддан қуритиш мақсадида зарар етказилгани аниқланди.
Тошкент ботаника боғи хулосасига кўра, дарахтлар қуриш ҳолатига келиб қолган. Натижада Вазирлар Маҳкамасининг 2022 йил 22 августдаги 464-сонли қарорининг 4-иловасига асосан ўсимлик дунёсига 1 миллиард 97 миллион 184 минг сўм зарар етказилганлиги маълум бўлди.
Тегишли ҳужжатлар ҳолатга ҳуқуқий баҳо бериш ва тегишли чора кўриш мақсадида прокуратура органларига юборилган.
Изоҳ (0)