“Никоҳ тақиқланмади, уни мустаҳкамлаш учун тартибга солиняпти” — Алишер Қодиров

Олий Мажлис Қонунчилик палатасининг 5 сентябрь куни бўлиб ўтган мажлисида “Ўзбекистон Республикасининг Жиноят кодексига ва Ўзбекистон Республикасининг Маъмурий жавобгарлик тўғрисидаги кодексига ўзгартириш ва қўшимчалар киритиш ҳақида”ги қонун лойиҳаси кўриб чиқилиб, қабул қилинганди. Депутат Алишер Қодиров киритилаётган қўшимчалар жамоатчилик томонидан кенг муҳокама қилинаётгани сабаб, бу борада ўз фикрларини билдириб ўтди.

Таклиф этилаётган қонун лойиҳаси билан, хусусан, икки ёки ундан ортиқ хотин билан эр-хотин бўлиб яшашни тарғиб қилганлик, хотин-қизлар ва эркаклар тенг ҳуқуқлилигини очиқдан-очиқ инкор этганлик учун, шунингдек, жамоат жойларида шахсини идентификация қилиш имконини бермайдиган даражада юзини тўсган ҳолда бўлганлик учун маъмурий жавобгарлик белгиланмоқда.

“Бу чекловлар билан жамиятимизнинг қадрли мезонларини ҳимоя қилишга умид қиляпмиз. Оила, аёл, аврат, никоҳ, фарзанд… ҳаммамиз учун, жуда қадрли мезонлар! Бугунги аҳволимизга қаранг! Ким қадрли мезонларимизни хавф факторларига айлантириб юборяпти!?

Масалан, динимизда аёл кишининг юзи аврат эмас, лекин эътиқодни ниқоб қилиб, юзини тамоман ёпиб олган “мақсади номаълум”, бурқа кийиб олган эркаклар қўлга тушди, улар кимлар ва мақсадлари нима? Авратни ёпиб юриш шарт, лекин юзингни очиб юр, Яратган юзни аврат қилмадику? Жамият, қолаверса яқинларимизни хавфсизлиги учун бунга эътибор бермаслик мумкинми?”, — дейди депутат.

Унинг таъкидлашича, никоҳ биринчи навбатда мажбурият. Никоҳ ўқитиб олиб, учта-тўртталаб фарзандни кўчага ташлаб кетаётган эркаклар кўпайиб кетди. Қонунчиликка киритилаётган қўшимчалар билан никоҳ тақиқланмади, уни мустаҳкамлаш учун тартибга солиняпти.

“Давлатга кўринмайдиган, қонунга асосан ёрдам бериш мумкин бўлмаган беҳужжат аёллар, болалар кескин ортиб кетди, бу кетишда нима бўлади?! Никоҳ, оила, фарзанд шунчалар беқадр бўлдими? Никоҳ тақиқланмади, уни мустаҳкамлаш учун тартибга солиняпти: аввал рўйхатдан ўт, давлат ҳар бир фуқарони ҳисобини билиши керак!” — дейди Алишер Қодиров.

У алимент тўламай юрадиган эркаклар ҳақида ҳам тўхталиб ўтди.

“Реклама биринчи бўлиб қорни очга таъсир қилганидек, битта оилани эплаш қўлидан келмаган 'қаҳрамонлар', динимизда белгиланган аниқ ва жуда оғир шартлар ва мажбуриятларга қарамай, бир калла қанд билан никоҳ ўқитиб олиб, ғўддайиб алиментдан қочиб юришибди. Бу никоҳга иснод, аёлни ҳўрлаш эмасми!? Фаросат ва диний билими борлар тушунадиган чекловни тақиқ деб бақираётганлар айнан шу ғўдайганлар бўлиб чиқса ҳайрон бўлмайман”, — деб қайд этди Алишер Қодиров.

Олий Мажлис Қонунчилик палатаси депутати нега камситишларга жазо кучайиши кераклигини ҳам тушунтирди.

“Эътиқод сабабли камситиш каби совет касалидан қутилаяпмиз, лекин миллий, этник, 'кўпчилик-озчилик' ниқобини кийиб олиб, қолганларни камситиш, оғзига уриш, провокация қилиш, йўқ жойда низо, адоват қўзғатишнинг мақсад-оқибатлари ҳақида соатлаб ёзиш мумкин. Бунга йўл қўймаслик учун ҳуқуқий асос яратилмоқда. Осон бўладими ҳуқуқий баҳо? Албатта йўқ, лекин қараб турмоқчи эмасмиз. Амалиёт хато кўрсатса, тузатилади, таҳлиллар тўхтатилмайди”, — деди у.

Алишер Қодировнинг билдиришича, Қонунчилик палатасида халқ, миллат, давлат, қадриятлар ҳақида қарорлар етмиш марта ўлчанади, бу муҳим қоида.

“Албатта ёзиб, ҳаммасини тушунтириш қийин, айниқса ўжарлик билан кўзини очишни рад этаётганларга!  Лекин, бир нарсани аниқ айтаман, қонунлар ишланаётганида мутахассислар, соҳа билимдонлари билан маслаҳат қилинади. Сиз тушунмаяпсиз дегани, хато дегани эмас! Муаммоларни муҳокама қилишни ўрганишимиз керак.

Гоҳида, ҳаммага ҳам ёқмайдиган, лекин ҳамма учун зарур қарорлар ҳам қабул қилинади, буни ҳаммага тушунтириб бўлмайди… Бир-биримизни асрашни ўрганмасак эл бўлолмаймиз”, — деди депутат.