Байрам кунларида кузатилган илиқ ва қуёшли об-ҳаводан сўнг, кеча кечқурун республика ҳудудига Ғарбий Қозоғистон ҳудудларидан нисбатан салқин ва бир оз нам ҳаво массаси кириб келди, деб хабар бермоқда “Ўзгидромет”.
Маълум қилинишича, 4 сентябрь кун давомида Ўзбекистон ҳудуди бўйича ҳаво бир оз булутли бўлади, шарқий ҳудудларда ўзгариб туради, ёғингарчилик кутилмайди, фақат Фарғона водийсининг айрим жойларида куннинг биринчи ярмида бир оз ёмғир ёғиши мумкин. Ҳаво ҳарорати кечаги кунга нисбатан 3-5 даражага паст бўлиб, 24-27 даражани ташкил этади.
5 сентябрдан ва деярли иш ҳафтасининг охиригача Ўзбекистон ҳудуди бўйича ҳаво қуруқ ва кам булутли бўлади, фақат Фарғона вилоятининг тоғли ҳудудларида бир оз ёмғир ёғиши мумкин.
8 сентябрь, жума куни булутли об-ҳаво кучайиши кутилмоқда, республиканинг айрим тоғолди ва тоғли ҳудудларида қисқа муддатли ёмғир ёғади.
Ҳафтанинг биринчи ярмида айниқса кечаси ва эрталаб нисбатан салқин бўлади. Ҳарорат асосан кечалари 10-13 даража, кундуз кунлари 26-29 даража бўлади. Ҳафтанинг иккинчи ярмида ҳарорат кечалари 15-18 даражагача, кундуз кунлари 29-32 даражагача кўтарилади.
Тошкентда 5—8 сентябрь кунлари ҳаво бир оз булутли бўлади, вақти-вақти билан ўзгариб туради, ёғингарчилик кутилмайди. Шамол шарқдан 3-8 метр/секунд тезликда эсади, 7—8 сентябрда 12-14 метр/секундгача кучайиши мумкин. Ҳарорат 5 сентябрда кечаси 11-13 даража, кундузи 25-27 даража бўлади, 6—8 сентябрда кечалари 15-18 даражагача, кундуз кунлари 29-32 даражагача кўтарилади.
Изоҳ (0)