Ўтган ойда энг кам солиқ тушумлари Хоразм, Бухоро, Қашқадарё ва Андижон вилоятларида қайд этилган. Бу ҳақда Иқтисодий тадқиқотлар ва ислоҳотлар маркази “Дарё”га маълум қилди.
Марказ ҳудудларнинг ишбилармонлик фаоллиги таҳлилини ўтказди. Маълум бўлишича, июль ойида республика солиқ тушумлари ҳажми ўтган йилнинг шу даврига нисбатан 5,9 фоиз ошган.
Солиқ тушумларининг сезиларли ўсиши Жиззах (41 фоиз), Тошкент (26,8 фоиз), Сирдарё (23,9 фоиз), Навоий (20,5 фоиз), Наманган (16,9 фоиз) вилоятлари ҳамда Тошкент шаҳри (18,3 фоиз) ва Қорақалпоғистонда (12,3 фоиз) қайд этилди.
Солиқ тушумлари манбалари бўйича даромад солиғи — 25 фоизга, мол-мулк солиғи — 31 фоизга, ер солиғи — 19 фоизга ошди.
Солиқларнинг энг кам тушуми Хоразм (7,8 фоиз), Бухоро (9,2 фоиз), Қашқадарё (10,2 фоиз) ва Андижон (10,4 фоиз) вилоятларида қайд этилган.
Таҳлил қилинаётган давр учун божхона тўловлари бўйича тушумлар 19,7 фоизга ўсган. Божхона тушумларининг энг катта ўсиши Жиззах (72,3 фоиз), Самарқанд (31,6 фоиз), Сурхондарё (26,9 фоиз), Тошкент (24,3 фоиз), Андижон (23,7 фоиз) вилоятларида ва Тошкент шаҳрида (29,1 фоиз) кузатилди.
Божхона тушумларининг ўсиши асосан маҳсулотлар турлари, жумладан, транспорт ускуналари ва унинг бутловчи қисмлари, техник жиҳозлар, металл ва улардан тайёрланган маҳсулотлар, электротехника ва бутловчи қисмлар ва озиқ-овқат маҳсулотлари бўйича ўтган йилнинг шу даврига нисбатан импорт ҳажмининг қарийб 28,8 фоиз ошгани билан боғлиқ”, — дея маълум қилган марказ.
Ҳисоб-китобларга қараганда, жорий йил бошидан буён товарлар экспорти ҳажми 11,8 фоиз камайди.
“Экспорт ҳажмларининг пасайиши асосан ип-калава, минерал ўғитлар ва трикотаж буюмлари, металлар ва улардан ясалган буюмлар, озиқ-овқат маҳсулотлари экспорти қисқариши, камроқ даражада , ички истеъмолнинг кўпайиши билан изоҳланувчи нефтни қайта ишлаш маҳсулотлари, табиий газ билан боғлиқ”, — дейилади манбада.
Экспортнинг энг катта ўсиши Хоразм (29,9 фоиз), Сирдарё (28,5 фоиз), Қашқадарё (16,3 фоиз) ва Сурхондарё (13,9 фоиз) вилоятларида кузатилди.
Ўзбекистон экспортининг ўсиши озиқ-овқат маҳсулотлари, саноат ва қишлоқ хўжалиги маҳсулотлари, кимёвий моддалар экспортининг ўсиш суръатлари билан изоҳланади.
Тижорат банклари томонидан берилган кредитлар ҳажми йил бошидан буён 16,5 фоизга ўсди.
Кредитлар беришда Сирдарё (37,7 фоиз), Жиззах (20,6 фоиз), Қашқадарё (20,4 фоиз), Хоразм (16,7 фоиз) ва Навоий (16,6 фоиз) вилоятларида ҳамда Тошкент шаҳрида (29,6 фоиз) сезиларли ўсиши қайд этилди.
Таҳлил қилинаётган даврда Ўзбекистон Республика товар-хом ашё биржасида тузилган битимлар ҳажми 1,7 фоизга камайди.
Биржа фаоллигининг сезиларли ўсиши Қорақалпоғистон Республикаси (15,1 фоиз), Сирдарё (12,3 фоиз), Андижон (11,2 фоиз), Қашқадарё (9,8 фоиз) ва Наманган (9,2 фоиз) вилоятларида кузатилмоқда.
Ушбу ҳудудларда битимлар ҳажмининг ўсиши пахта толаси, буғдой, буғдой уни, минерал ўғитлар, дизел ёқилғиси, техник чигитлар, суюлтирилган газ, автомобиль бензини, қурилиш ва хўжалик материаллари, шакар, қора ва рангли металларни прокатлаш, полиэтилен ва бошқа товарларни сотишни кўпайтириш орқали таъминланади.
Таҳлил қилинган даврда 52 744 та янги хўжалик юритувчи субъект ташкил этилди, уларнинг энг кўп сони Тошкент шаҳрида (10 021), Фарғона (4 910), Самарқанд (4 899), Тошкент (4 203), Қашқадарё (3 964), Хоразм (3 680) вилоятларида рўйхатга олинди.
Изоҳ (0)