Мурожаатчилардан бири Пенсия жамғармасига 10 йилдан бери Россияда ишлаши, бу давр учун унга иш стажи қандай ҳисобланиши ҳақида савол йўллаган. Жамғарма жавобига қараганда, чет элда ишланган даврлар бир неча шартлар асосида меҳнат стажига қўшилади.
Қонунчиликка кўра, чет элда ишланган даврлар қуйидаги шартларга кўра иш стажига қўшилади:
- 2019 йил 1 январгача бўлган давр учун Пенсия жамғармасига суғурта бадаллари тўланган тақдирда;
- 2019 йил 1 январдан 2019 йил 31 декабргача бўлган даврда ягона ижтимоий тўлов тўланган тақдирда;
- 2020 йил 1 январдан ижтимоий солиқлар тўланганда.
Меҳнат шартномаси тузмаган ҳолда чет элда ишлаётган Ўзбекистон фуқаролари меҳнат стажига эга бўлиш учун ижтимоий солиқ тўлаш ҳуқуқига эга эмас.
Ўзбекистон фуқароларининг ёлланма (битим) асосда чет элда ишлагани ҳукумат ваколат берган органлар меҳнат дафтарчасига киритган қайдномаларга қараб аниқланади.
Чет эл фуқароларига ва фуқаролиги бўлмаган шахсларга чет элдаги иши Ўзбекистонда ишланганига тўғри келадиган стажнинг 1/3 ҳиссасидан ошмаган миқдорда, стажга қўшилади.
Аввалроқ мамлакатда иш стажи кимларга икки баробар қўшиб ҳисобланиши маълум қилинганди.