O‘tgan oyda eng kam soliq tushumlari Xorazm, Buxoro, Qashqadaryo va Andijon viloyatlarida qayd etilgan. Bu haqda Iqtisodiy tadqiqotlar va islohotlar markazi “Daryo”ga maʼlum qildi.
Markaz hududlarning ishbilarmonlik faolligi tahlilini o‘tkazdi. Ma’lum bo‘lishicha, iyul oyida respublika soliq tushumlari hajmi o‘tgan yilning shu davriga nisbatan 5,9 foiz oshgan.
Soliq tushumlarining sezilarli o‘sishi Jizzax (41 foiz), Toshkent (26,8 foiz), Sirdaryo (23,9 foiz), Navoiy (20,5 foiz), Namangan (16,9 foiz) viloyatlari hamda Toshkent shahri (18,3 foiz) va Qoraqalpog‘istonda (12,3 foiz) qayd etildi.
Soliq tushumlari manbalari bo‘yicha daromad solig‘i — 25 foizga, mol-mulk solig‘i — 31 foizga, yer solig‘i — 19 foizga oshdi.
Soliqlarning eng kam tushumi Xorazm (7,8 foiz), Buxoro (9,2 foiz), Qashqadaryo (10,2 foiz) va Andijon (10,4 foiz) viloyatlarida qayd etilgan.
Tahlil qilinayotgan davr uchun bojxona to‘lovlari bo‘yicha tushumlar 19,7 foizga o‘sgan. Bojxona tushumlarining eng katta o‘sishi Jizzax (72,3 foiz), Samarqand (31,6 foiz), Surxondaryo (26,9 foiz), Toshkent (24,3 foiz), Andijon (23,7 foiz) viloyatlarida va Toshkent shahrida (29,1 foiz) kuzatildi.
Bojxona tushumlarining o‘sishi asosan mahsulotlar turlari, jumladan, transport uskunalari va uning butlovchi qismlari, texnik jihozlar, metall va ulardan tayyorlangan mahsulotlar, elektrotexnika va butlovchi qismlar va oziq-ovqat mahsulotlari bo‘yicha o‘tgan yilning shu davriga nisbatan import hajmining qariyb 28,8 foiz oshgani bilan bog‘liq”, — deya maʼlum qilgan markaz.
Hisob-kitoblarga qaraganda, joriy yil boshidan buyon tovarlar eksporti hajmi 11,8 foiz kamaydi.
“Eksport hajmlarining pasayishi asosan ip-kalava, mineral o‘g‘itlar va trikotaj buyumlari, metallar va ulardan yasalgan buyumlar, oziq-ovqat mahsulotlari eksporti qisqarishi, kamroq darajada , ichki isteʼmolning ko‘payishi bilan izohlanuvchi neftni qayta ishlash mahsulotlari, tabiiy gaz bilan bog‘liq”, — deyiladi manbada.
Eksportning eng katta o‘sishi Xorazm (29,9 foiz), Sirdaryo (28,5 foiz), Qashqadaryo (16,3 foiz) va Surxondaryo (13,9 foiz) viloyatlarida kuzatildi.
O‘zbekiston eksportining o‘sishi oziq-ovqat mahsulotlari, sanoat va qishloq xo‘jaligi mahsulotlari, kimyoviy moddalar eksportining o‘sish surʼatlari bilan izohlanadi.
Tijorat banklari tomonidan berilgan kreditlar hajmi yil boshidan buyon 16,5 foizga o‘sdi.
Kreditlar berishda Sirdaryo (37,7 foiz), Jizzax (20,6 foiz), Qashqadaryo (20,4 foiz), Xorazm (16,7 foiz) va Navoiy (16,6 foiz) viloyatlarida hamda Toshkent shahrida (29,6 foiz) sezilarli o‘sishi qayd etildi.
Tahlil qilinayotgan davrda O‘zbekiston Respublika tovar-xomashyo birjasida tuzilgan bitimlar hajmi 1,7 foizga kamaydi.
Birja faolligining sezilarli o‘sishi Qoraqalpog‘iston Respublikasi (15,1 foiz), Sirdaryo (12,3 foiz), Andijon (11,2 foiz), Qashqadaryo (9,8 foiz) va Namangan (9,2 foiz) viloyatlarida kuzatilmoqda.
Ushbu hududlarda bitimlar hajmining o‘sishi paxta tolasi, bug‘doy, bug‘doy uni, mineral o‘g‘itlar, dizel yoqilg‘isi, texnik chigitlar, suyultirilgan gaz, avtomobil benzini, qurilish va xo‘jalik materiallari, shakar, qora va rangli metallarni prokatlash, polietilen va boshqa tovarlarni sotishni ko‘paytirish orqali taʼminlanadi.
Tahlil qilingan davrda 52 744 ta yangi xo‘jalik yurituvchi subyekt tashkil etildi, ularning eng ko‘p soni Toshkent shahrida (10 021), Farg‘ona (4 910), Samarqand (4 899), Toshkent (4 203), Qashqadaryo (3 964), Xorazm (3 680) viloyatlarida ro‘yxatga olindi.
Izoh (0)