Орол денгизи ҳудудидан ноқонуний тарзда артемия систаларини йиғиб олаётган шахслар қўлга олинди. Бу ҳақда Экология вазирлиги ахборот хизмати хабар берди.
Хабарга кўра, Қорақалпоғистон Экология, атроф-муҳитни муҳофаза қилиш ва иқлим ўзгариши вазирлиги, божхона бошқармаси Контрабандага қарши курашиш бўлими, Мўйноқ тумани ички ишлар бошқармаси ҳамда Миллий гвардия ходимлари ҳамкорлигида Қозоғистон Республикаси чегара олди ҳудудлари, Орол денгизи қирғоқларида тезкор рейд тадбири ўтказилди.
Тадбир давомида бир гуруҳ шахслар томонидан қиймати 102,9 миллион сўмга тенг бўлган жами 1029 кг артемия систалари ҳеч қандай ҳужжатларсиз, ноқонуний равишда йиғиб олиб кетилаётгани аниқланди ва тўхтатилди.
Ҳолат натижасида табиатга 68 миллион сўм миқдорида моддий зарар келтирилгани маълум бўлди. Айни дамда ҳолат юзасидан тегишли идоралар томонидан терговга қадар текширув ҳаракатлари олиб борилмоқда.
Маълумот учун, артемия систалари Орол денгизининг қуриган соҳилларида ҳаёт кечиради. Хлорланган, сулфатланган, карбонат ва тузли муҳитда яхши кўпайишга ихтисослашган ушбу тирик мавжудотлар аквамаданият саноатида, қишлоқ хўжалиги, фармацевтика, тиббиёт ва косметологияда кенг қўлланилади.
Орол денгизи ҳудудларидан артемия систаларини йиғиб олиш учун экология органлари томонидан квота берилиши ва табиатга зарар етказмаган ҳолда ушбу тирик мавжудот систаларидан кўрсатилган миқдорлардагина фойдаланиш мумкинлиги белгиланган.
Изоҳ (0)