“Афғонлар буни тушунмади” — “Ўзбекнефтгаз” раиси “Толибон” сифатсиз деб қайтарган маҳсулот аслида юқори сифатли эканини айтди

Август ойи бошида “Афғонистон ҳукумати сифати пастлиги сабаб 67 та цистернадаги нефтни Ўзбекистонга қайтариб юборди”, деган мазмундаги хабарлар тарқалган. 25–26 август кунлари Қашқадарё вилоятига уюштирилган пресс-турда “Ўзбекнефтгаз” раиси Баҳодир Сиддиқов мазкур хабар нотўғри талқин қилинганини тушунтирди, дея хабар берди “Дарё” мухбири.

Баҳодир Сиддиқовнинг айтишича, маҳсулот сифати пастлиги учун эмас, балки унинг стандарти Афғонистонда йўқлиги учун қайтарилган.

“Афғонистон Ўзбекистон нефтини сифатсиз бўлгани учун қайтарибди, деган хабар тарқалди. Бу нотўғри маълумот. Чунки биз Афғонистонга нефть юбормаганмиз. Айримлар Афғонистонни бензинини қайтариб олиб келиб, заправкаларда сифатсиз бензин сотаётганимизни айтмоқда. Бу ҳам нотўғри маълумот. Биз Афғонистондан қайтиб келган маҳсулотни ҳеч қаерга олиб борганимиз йўқ. У контейнерида турибди. Уни бошқа жойга олиб бориб ёки сотади. Бу дизел GTL заводида чиққан, янги маҳсулот. Унинг стандарти Афғонистонда йўқ. Шунинг учун улар буни тушунмади”,— деди компания раҳбари.

Баҳодир Сиддиқов янги дизел сувга ўхшашини кўрсатиб, унинг сифати оддий дизелникидан анча юқори эканини таъкидлади.

Бу янги маҳсулот Афғонистон бозорига кириб бориши керак эди. Афсуски, биринчи партияни қайтариб юборишди. Лекин бу жараён. Ҳар бир бозорга кириб бориш осон бўлмайди. Ишончим комил, бу ерда нафақат Афғонистон ҳукумати, балки бизни у бозорга кириб боришимизни истамайдиган одамлар жуда кўп. Чунки Афғонистоннинг бозори жуда яхши бозор. Бу маҳсулотнинг сифатли эканини исботлаш учун айтаманки, Эстонияга ўтган ойда худди шу дизелдан 1000 тонна сотдик. Улар “премия”си билан олишди ва 10 000 тоннага буюртма беришди. Ҳозирги кунда 10 000 тонна маҳсулотни ортяпмиз. Бундан ташқари, ҳукуматлараро келишувлар бор. Ўрта коридор орқали маҳсулотимизни Европага етказиб бериш йўлини қидираётганимизда грузияликлар: “Бу зўр маҳсулот, бизга 33 000 тонна беринглар, мана шартнома ва пул”, деди. Бу маҳсулотнинг сифатига ҳеч кимда шубҳа бўлмаслиги керак, — деди у.

Маълум қилинишича, 2022 йилда мазкур дизелдан Тожикистонга 12 000 тонна сотилган. Ҳозир яна 5 000 тонна буюртма қилинган.

“Сизларга кафолат бериб айтаманки, улар бу маҳсулотни сифати ёмон бўлганидан қайтариб юбормаган. Бу ерда бошқа сабаблар бор деб ўйлайман. Чунки маҳсулотимиз “Евро–6” стандартларига жавоб беради. Афғонистон бозорига биз хоҳласак ҳам, хоҳламасак ҳам кирамиз. Сабаби у бизга яқин бозор. Рақобатчиларимиз эса Афғонистондан анча узоқда. Бизнинг маҳсулот сифат жиҳатдан уларнинг маҳсулотидан яхши. Афғонистоннинг стандарт агентлиги раҳбари ўтган ойда Ўзбекистонга келиб кетди. Биз уларга заводимизни, сертификатларимиз ва миллий стандартларимизни кўрсатдик. Улар бизга: “барча изланишларингни беринглар, балки уни ўзимизда ҳам татбиқ қилармиз”, дейишди. У иш кетяпти. Лекин менинг шахсий фикримча, дизелни қайтариб юбориши Афғонистон тарафнинг ўз фикри эмас. Бошқа омиллар ҳам бор. Ўйлайманки, рақобатбардош маҳсулот чиқара олганмиз. Ва у бозорга барибир кириб боради”, — деди Баҳодир Сиддиқов.

Аввалроқ “Ўзбекнефтгаз” Афғонистон 67 та цистернадаги нефтни Ўзбекистонга қайтариб юборгани ҳақидаги хабарлар асоссизлигини маълум қилганди.