Ўзбекистон Суперлигасининг қолдирилган 17-турида “ОКМК” ва “Нефтчи” жамоалари 1:1 ҳисобида дуранг қайд этди.
Ушбу учрашувида юзага келган баҳсли вазиятлар мухлисларнинг норозилиги ҳамда эътирозларига сабаб бўлди. Шу боисдан Эксперт-ҳакамлар комиссияси ўйиндаги баҳсли вазиятлар борасида ўз фикрларини билдириб, якуний хулосаларини маълум қилди.
1-вазият: Пенальти бор ёки йўқ?
Дастлаб учрашувнинг 42-дақиқасида “Нефтчи” дарвозаси томон белгиланган пенальти вазияти кўриб чиқилди. Унга кўра, комиссия вакиллари узоқ вақт давом этган баҳслардан сўнг, овоз бериш йўли билан масалани ҳал қилди. Натижада, овозларнинг катта қисми (80%) ушбу вазиятда пенальти бор деб топди ва ҳакамнинг қарори тўғри, дея баҳоланди.
2-вазият: Офсайд бормиди ёки “Нефтчи”нинг голи ноҳақ бекор қилиндими?
Ўйиннинг 45-дақиқасида юзага келган “Нефтчи” томонидан урилган голнинг офсайд сабабли бекор қилиниши ҳам кўплаб норозиликларга сабаб бўлди. Шу туфайли, ўша вазиятда ВАР томонидан офсайд чизиғи тортилгани ва вазият ўша пайтиёқ текширилиб, қарор тўғри чиқарилгани акс этган видеотасвир илова қилинди. Эксперт ҳакамлар комиссияси аъзолари бир овоздан ҳакамларнинг қарори бу ҳолатда тўғри бўлган, деган хулосага келди.
3-вазият: Қизил ёки сариқ карточка?
Баҳснинг 57-дақиқасида “ОКМК” футболчиси Ислом Тўхтахўжаев томонидан рақиб футболчисига нисбатан ўйин қоидаси қўпол тарзда бузилган. Бош ҳакам Илгиз Танташев эса дастлаб футболчига тўғридан тўғри қизил карточка кўрсатган, бироқ ВАРга мурожаат қилгач, қарорини ўзгартириб, бу вазиятда сариқ карточка билан кифояланган. Эксперт ҳакамлар комиссияси ушбу ҳолатни чуқур таҳлил қилгач, қизил карточка кўрсатилиши керак бўлган, деган хулосага келди.
Изоҳ (0)