“Манчестер Юнайтед” ва “Вулверҳэмптон” баҳсини бошқариб борган ҳакам 2-тур ўйинларидан четлатилди

Футбол бўйича Англия Премьер Лигасининг 1-турида “Манчестер Юнайтед” “Вулверҳэмптон” устидан 1:0 ҳисобида ғалаба қозонди. 

Ўйиннинг 97-дақиқасида манкунианликлар дарвозабони Андре Онана ўз жарима майдонида ишончсиз ҳаракат қилиб, рақиб жамоа ҳужумчиси Саша Калайжич томонга отилганди ва қўллари билан унинг бошига зарба берганди. 

ВАР ушбу лавҳани кўриб чиқди, бироқ ҳакам Саймон Ҳупер пенальти белгиламади. 

“Вулверҳэмптон” бош мураббийи Гари Ўнил ушбу вазият ҳақида гапираркан: 

“Жонатан Мосс (АПЛ ҳакамлар корпуси етакчиларидан бири) бу тоза пенальти эканлигини айтди. У ҳакамлар номидан узр сўради. Бугун у билан кўп суҳбатлашдим. 

Жонга раҳмат, у хатони тан олди. У ҳалигача майдондаги ҳакам пенальти белгиламаганидан, ВАР эса вазиятни ўзгартирмаганидан ҳайратда”, — деди.

BBC’нинг қўшимча қилишича, Мосс “Вулверҳэмптон” бош мураббийининг интервьюси ва матбуот анжумани оралиғида унинг ёнига келган ва суҳбатлашган. Ундан ташқари Англия ҳакамлар қўмитаси раҳбари Ҳовард Уэбб мураббий билан алоқага чиқиб, хато учун узр сўраган. 

Учрашувни бошқариб борган ҳакам Саймон Ҳупер, шунингдек, ВАРда ишлаган ҳакамлар Майкл Солсбери ва Ричард Уэст АПЛнинг 2-туридан четлатилган.