Мустақиллик байрами муносабати билан пенсия тўловлари картага муддатидан олдин ташлаб берилади. Бу ҳақда Иқтисодиёт ва молия вазирлиги ҳузуридаги бюджетдан ташқари Пенсия жамғармаси хабар берди.
Ўзбекистон мустақиллигининг 32 йиллик байрами муносабати билан 2023 йилнинг 1 сентябрь — жума ҳамда 2—3 сентябрь шанба ва якшанба дам олиш кунига тўғри келмоқда.
Шу сабабли республикада кекса ёшдаги фуқароларни, пенсия ва нафақа олувчиларни, ногиронлиги бўлган шахсларни қўллаб-қувватлаш ҳамда Мустақиллик байрамини кўтаринки руҳда кутиб олишларини таъминлаш мақсадида, пенсия ва нафақа тўловларини нақд пулсиз (банк карта) шаклда олувчи фуқароларнинг сентябрь ойи учун пенсия ва нафақалари 29—31 август кунлари уларнинг банк пластик карталарига ўтказиб берилади.
Нақд пул шаклида пенсия ва нафақа олувчиларга тўловлар 4 сентябрь кун бошидан Халқ банки сайёр кассалари томонидан графикка мувофиқ амалга оширилади.
Пенсия жамғармаси маълумотларига кўра, бугунги кунда давлат пенсияларининг барча турлари учун йиллик 53,5 триллион сўм тўланмоқда. Бунда бир ойлик ўртача харажатлар миқдори қарийб 4,5 триллион сўмни ташкил этади.
Изоҳ (0)