Ўзбекистонда 2023 йилнинг ўтган даври мобайнида келиб тушган мурожаатлар асосида “Ўзэнергоинспекция” ходимлари томонидан ўтказилган ўрганишларда 4 минг тоннадан ортиқ сифатсиз автобензин сақланаётгани аниқланди.
Кучлик нефть базаси (73,2 тонна), Навоий нефть базаси ( 38,7 тонна), Урганч нефть базаси (2,072 минг тонна) ва Бухоро нефть базалари (1,86 минг тонна) МЧЖларда сақланаётган автобензин сифати давлат стандарти талабларига жавоб бермаслиги, яъни автобензин таркибидаги қатрон (смола) ва олтингугурт (сера) миқдори белгиланган меъёрдан юқори ҳамда бир ҳолатда (“Навоий нефть базаси” МЧЖ) октан сони меъёрдан пастлиги аниқланган. Жами аниқланган сифатсиз маҳсулотлар миқдори 4,044 минг тоннани ташкил этган.
Кучлик (73,2 тонна) ва Навоий (38,7 тонна) нефть базаларида аниқланган сифатсиз нефть маҳсулотларининг сифатлари “Ўзэнергоинспекция”нинг мажбурий кўрсатмасига асосан тегишли йўриқнома асосида сифати тикланиб, камчилик бартараф этилиб, истеъмолчиларга сифатли тарзда етказиб берилган. Нефть маҳсулотларининг сифати бўйича истеъмолчилардан эътирозлар бўлмаган.
“Урганч нефть базаси” МЧЖ ва унинг Шовот ҳамда Хонқа филиалларида (2,072 минг тонна) аниқланган сифатсиз автобензиннинг 587,0 тоннаси “Ўзэнергоинспекция”нинг мажбурий кўрсатмасига асосан, ўрнатилган тартибда сифати тикланиб, истеъмолчиларга етказиб берилган. Ушбу маҳсулот бўйича ҳам истеъмолчилардан эътирозлар келиб тушмаган. Ҳозирги кунда 1,485 минг тонна автобензиннинг сифатини тиклаш ишлари давом эттирилмоқда.
“Бухоро нефть базаси” МЧЖ ва унинг Қоракўл филиалида (1,86 минг тонна) аниқланган сифатсиз нефть маҳсулотларининг 323 тоннасини “Ўзэнергоинспекция”нинг мажбурий кўрсатмасига биноан, ўрнатилган тартибда сифати тикланиб, истеъмолчиларга етказиб берилган. Ҳозирги кунда 1,537 минг тонна автобензин сифатини тиклаш ишлари давом эттирилмоқда.
“Ўзбекнефтгаз” матбуот хизматининг маълум қилишича, нефть маҳсулотлари сифати бузилишига йўл қўйган 4 нафар раҳбар ходим ва 4 нафар моддий жавобгар шахслар фаолиятига нисбатан ҳуқуқий баҳо берилади.
Нефть маҳсулотларини сифат ва миқдор жиҳатидан бус-бутун сақланишини таъминлаш юзасидан барча нефть база раҳбарлари огоҳлантирилган ва келгусида нефть маҳсулотларини сифат жиҳатидан тўлиқ сақлаш ҳамда истеъмолчиларга сифатли тарзда етказиб берилишини таъминлаш бўйича нефть базалар томонидан тегишли чора-тадбирлар ишлаб чиқилмоқда.
Изоҳ (0)