Озарбайжоннинг 7 та туманида ўзбек модели асосида пилла етиштириш йўлга қўйилди

Озарбайжонда ўзбек модели асосида ипакчилик ривожлантирилади. Бу ҳақда “Ўзбекистон 24” телеканалининг “Менимча” кўрсатувида маълумот берилди.

Кўрсатув учун интервью бераркан, “Ўзбекипаксаноат” уюшмаси раиси Олимжон Жумаев бундан 6 йил илгари ўзбек ипакчилари хорижда корхона очиши мураккаб масала бўлганини эслаган.

“Пиллачилик ижтимоий соҳа. Чунки пиллачиликда асосан аҳолининг камбағал қатлами иш билан банд бўлади. Бугунги кунда Ўзбекистонда 1,2 миллион нафарга яқин одам пиллачилик тармоғида иш билан банд. Шу нуқтаи назардан Озарбайжоннинг 7 та туманида ўзбек модели асосида пилла етиштириш, уни қайта ишлаш амалга оширилмоқда.

2017 йилда Ўзбекистондаги  бирорта корхона ипакчилари бошқа давлатларга бориб корхона очади ёки 100 фоиз ўзбек инвестицияси асосида қўшма лойиҳаларни амалга оширади десак ҳеч ким ишонмаган бўларди”, — деди у.

Озарбайжонлик тадбиркор Фозил Ҳумматовнинг таъкидлашича, ўзбек ипакчиларидан ўрганадиган жиҳатлар кўп.

Озарбайжонда пиллачилик анча сусайиб, ривожланишдан ортда қолганди. Ўзбекистонда эса аксинча, тармоқ анча олдинда. Ўзбекистонлик ҳамкорлар кўмагида ушбу йўналишни юртимизда ривожлантриш ниятидамиз.

Шу йилнинг февралида ипакчилик йўналишида корхона очдик. Оз вақт бўлса-да, эришилган натижамиз бор. 20 гектар ер майдонида пиллачиликда озуқа манбаси бўлган тут плантациялари жорий қилинмоқда. Шу пайтгача бу озуқа манбалари Озарбайжонга Хитойдан олиб келинарди. Харажатлар катта эди. Энди ўзбек тажрибаси асосида тут плантациялари ташкил этилмоқда.

Кейинги йили эса ҳудди Ўзбекистондаги каби тайёр ипак маҳсулотлари ишлаб чиқариш йўлга қўйилади, — деди у.