АҚШ собиқ президенти Дональд Трамп ўзига қўйилган айбловлар доирасида унга жами 561 йиллик қамоқ жазоси берилиши мумкинлигини айтди. Бу ҳақда Тhe Hill хабар бермоқда.
“Қийшиқ Жонинг (Трамп амалдаги президент Жо Байденни шундай атайди) коррупцияга ботган Адлия вазирлиги итоаткор хизматкорингизга қарши яна ноқонуний айбловлар қўйди. Хабарларга кўра… мени жами 561 йилга қамашлари мумкин. Бу олтита ҳаёт дегани”, — деб ёзган Трамп сайловолди кампанияси донорларига электрон почта хатида.
АҚШда айбланувчилар камдан-кам ҳолларда барча айбловлар бўйича максимал муддатга ҳукм қилинади, деб таъкидлади Тhe Hill. Бир нечта жиноят учун жазо муддатини параллел равишда ўташ мумкин, бу маҳкумнинг қамоқда ўтказадиган умумий вақтини қисқартиради.
Сўнгги ойларда Дональд Трамп учта жиноий иш бўйича айбланувчи деб топилди. Апрель ойида унга бизнес ҳисоботларини қалбакилаштириш айблови қўйилган, июнь ойида эса собиқ президентнинг махфий ҳужжатларни уйида ноқонуний сақлагани бўйича иш очилган. Август ойи бошида Трамп 2021 йил 6 январда Капитолийга уюштирилган босқин учун айбланди. У барча айбловларни рад этмоқда.
Трамп бўлажак сайловларда Республикачилар партиясидан президентликка асосий даъвогар ҳисобланади. Агар у жиноий ишларнинг бирортаси бўйича айбдор деб топилиб, қамоққа жўнатилган тақдирда ҳам бу уни АҚШ президентлигига номзод бўлиш ҳуқуқидан маҳрум қилмайди.
Изоҳ (0)