Олий судда совет давридаги “Учлик Кенгаши”нинг махсус йиғилиш қарорларига кўра айбланган 240 нафар шахсга доир бешта жиноят иши кўриб чиқилди. Бу ҳақда Олий суд матбуот хизмати хабар берди.
Қайд этилишича, 1929-1931 йилларда ҳозирги Қорақалпоғистон Республикаси, Сурхондарё, Навоий, Самарқанд ва Қашқадарё вилоятлари ҳудудларида босмачилик ҳаракати аъзолари бўла туриб, қуролли тўда тузиб, совет ҳукуматига қарши қуролли қўзғолон ёки аксилинқилобий мақсадларда ҳаракатларни амалга оширганликда айбланган Ўзбекистон ССР ва Қозоғистон ССР фуқаролари бўлган 240 нафар шахсга оид жиноят иши кўриб чиқилган.
Бош прокурор ўринбосари томонидан бу иш юзасидан Олий суднинг Жиноят ишлари бўйича судлов ҳайъатига апелляция протестини бериш муддатини тиклаш ҳақидаги илтимосномалар ҳамда апелляция тартибида протестлар келтирилган.
Очиқ суд мажлисида ушбу илтимосномалар ва протестлар кўриб чиқилиб, қаноатлантирилди ҳамда Жиноят-процессуал кодексининг 83-моддасига асосан 240 нафар шахсга нисбатан Олий суд Жиноят ишлари бўйича судлов ҳайъати апелляция инстанциясининг оқлов ҳукми чиқарилди.
Олий суднинг ҳукми билан реабилитация қилиниб, оқланган қатағон қурбонлари рўйхати билан ушбу ҳавола орқали танишиш мумкин.
Апрель ойида Олий судга 208 нафар шахсга оид 3 та жиноят иши келиб тушиб, ишчи гуруҳ томонидан ўрганиб чиқилганди.
Изоҳ (0)