Тошкент шаҳридаги чорраҳаларда тадбиркорлар томонидан ўрнатилган йўл ҳаракати қоидабузарликларини қайд қилувчи камералар билан боғлиқ вазият тўғрисида ижтимоий тармоқларда кўплаб хабарлар тарқалиб, ҳайдовчилар орасида норозилик ҳолатлари кузатилмоқда. ЙҲХХ ҳолатлар юзасидан расмий баёнот берди.
Унга кўра, мазкур лавҳа ва муносабатларда келтирилган ҳолатлар Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизмати томонидан ўрганилиб борилмоқда. Ўрганишлар давомида лавҳа ва муносабатларда келтирилган ҳолатларга объектив баҳо бериш, йўл инфратузилмаси ҳамда техник воситаларнинг ҳолатини қайта кўриб чиқиш, чорраҳаларда йўл ҳаракатини тўғри ташкил этиш мақсадида ИИВ ЖХД Йўл ҳаракати хавфсизлиги хизмати, Транспорт вазирлиги, Тошкент шаҳар ҳокимлигининг масъул ходимларидан иборат ишчи гуруҳи тузилди.
Бугунги кунда ишчи гуруҳ томонидан чорраҳаларда йўл ҳаракати қандай ташкил этилгани (йўл белгилари ва кўрсаткичлари тўғри ўрнатилганлиги, йўл чизиқлари чизилганлиги ва бошқалар), чорраҳалардаги техник воситаларнинг ҳолати қайтадан ўрганиб чиқилмоқда.
“Ишчи гуруҳ томонидан ўтказилаётган ўрганишлар натижалари бўйича қўшимча ахборот тақдим этилади”, — дейилади хабарда.
Изоҳ (0)