Тошкент вилояти ва шаҳрида 4 та ҳолатда 526 млн 514 минг сўмлик табиий газдан ноқонуний фойдаланилгани аниқланди. Бу ҳақда энергетика вазирлиги ахборот хизмати хабар берди.
Унга кўра, Энергетика вазирлиги ҳузуридаги “Ўзэнергоинспекция” томонидан ҳуқуқни муҳофаза қилувчи органлар ҳамда “Ҳудудгазтаъминот” АЖ ходимлари билан ҳамкорликда Тошкент вилояти ва шаҳрида ўтказилган назорат тадбирлари давомида табиий газдан ноқонуний фойдаланиш ҳолатлари мавжудлиги маълум бўлди. Хусусан:
Юқори Чирчиқ тумани, “Нурли замин” МФЙда жойлашган “Қ.С” МЧЖ газ тармоғига ноқонуний равишда уланганлиги натижасида давлат манфаатларига 480 млн 798,1 минг сўм (728 минг 482 метр куб);
Зангиота туманида жойлашган “М.М” МЧЖ газ тармоғига ноқонуний равишда уланганлиги натижасида давлат манфаатларига 19 млн 958,4 минг сўм (30 минг 240 метр куб);
Зангиота туманида жойлашган “П.М” МЧЖ газ тармоғига ноқонуний равишда уланганлиги натижасида давлат манфаатларига 9 млн 720 минг сўм (9 минг 720 метр куб);
Сергели тумани “Ўзгариш” МФЙда жойлашган “И.Ш” хусусий ширкати газ тармоғига ноқонуний равишда уланганлиги натижасида давлат манфаатларига 16 млн 38 минг сўм (24 минг 300 метр куб) миқдорида зарар етказгани аниқланди.
Дастлабки ҳисоб-китобларга кўра, мазкур 4 та ҳолатда давлат манфаатларига етказилган умумий зарар миқдори 526 млн 514,5 минг сўм (792 минг 742 метр куб табиий газ)ни ташкил этган.
Маълумот учун: ушбу ҳажмдаги табиий газ ҳозирги кунда қарийб 4 мингта хонадоннинг бир ойлик истеъмолига тенгдир.
Ҳозирги вақтда аниқланган ҳолатлар юзасидан ҳуқуқни муҳофаза қилувчи органлар томонидан ўрнатилган тартибда суриштирув ишлари олиб борилмоқда.
Изоҳ (0)