Тадбиркор Нигора Муротова “Дарё” мухбири билан суҳбатда коронавирус илк бор Ўзбекистонга кириб келган пайтда бошидан ўтган синовларни қандай қилиб енгганини эслади.
Тадбиркор Нигора Муротова 20 август —Тадбиркорлар куни муносабати билан “Шуҳрат” медали билан тақдирланди. Бу натижага эришгунча у кўплаб синовлардан ўтганини айтади. Хусусан, 2020 йилнинг 15 март куни Нигора Муротовада республикада илк бор коронавирус қайд этилганди. Мазкур ҳодиса аҳолида бир оз ваҳима уйғотган, ҳаттоки коронавирус Ўзбекистонда тарқалишига Нигора Муротовани сабабчи қилиб кўрсатишга уринганлар ҳам бўлган. Тадбиркор ўша даврдаги интервьюларидан бирида ижтимоий тармоқлардаги ҳақоратлар дилини оғритганини айтганди.
“Мени нафақат коронавирус касаллиги, балки шундай маънавияти паст одамларнинг ҳақоратлари жуда қийнади, соатлаб узлуксиз йиғлашга мажбур қилди. Ахир мен касалликни атайлаб олиб келмаганман-ку, биринчи навбатда оиламга, жигарларимга ўзим юқтирмайман-ку! Пандемия бу, айбдор қидиришнинг ўзи мантиқсизлик”, —дея фикр билдирган у.
Тадбиркор “Дарё” мухбири билан суҳбатда шундай оғир вазиятдан қандай чиққани, пандемиянинг ўз фаолиятига таъсири ҳақида гапирди.
“Инсон ҳаётда кўп синовларга дуч келади. Қийинчиликларни бошдан ўтказади. Бу синовлар, албатта, унга тайёр бўлган, у синовлардан ўта оладиган инсонларга бериларкан. Бу ҳақда эслашни ҳам, гапиришни ҳам хоҳламайман. Лекин бир гапни айтмоқчиман, қалбимизда борини ‘комментарий’да кўрсатамиз, қалбимизда борини инсонларга тарқатамиз. Қалбимизда самимият, оқкўнгиллик бўлса, биз атрофимиздагиларга шу энергияни берамиз. Қалбимизда кирлик, манмансираш ва кибр бўлса, кимдир йиқилган даврда уни тепкилаймиз, устидан куламиз. Интернетда танқидий ёзилган фикрлар ёнида, далда берадиган гаплар айтган таниш ва нотаниш инсонларнинг кўплиги менга куч берди”, — деди тадбиркор.
Нигора Муротова коронавирусдан даволангач, орадан 52 кун ўтиб иш фаолиятини бошлаганини эслади.
“У пайтда бизнинг давлатга ёрдамимиз керак эди. Коронавирус ўша йили ёзда авжига чиққанди. Биз ҳеч қанақа гина-кудурат қилмасдан, ўзимизда куч топиб фуқароларимизга жуда ҳам кўп ёрдам бердик. Ўша пайтда беморларни коридорларгача ётқизишга мажбур бўлганмиз. Ётоқларимиз шу даражада тўлиб кетганди. Чунки биздан Соғлиқни сақлаш вазирлиги илтимос қилганди. Давлат касалхоналари бу ‘нагрузка’ни кўтара олмаётганди, шунинг учун хусусий секторга ҳам беморларни даволаш имконияти берилган. Мана, пандемия ҳам ўтди. Шу фурсатдан фойдаланиб жамоамиз шифокорларига раҳмат айтаман. Уларнинг синовли кунларда қўллаганини қадрлайман”, —деди тадбиркор.
Маълумот учун, 2023 йил майда Жаҳон соғлиқни сақлаш ташкилоти раҳбари Тедрос Гебреесус дунёда Cоvid-19 пандемияси тугагани ҳақида хабар берган.
“2020 йилдан буён расман 7 миллионга яқин киши Cоvid-19 оқибатида ҳаётдан кўз юмди. Аммо реал рақамлар бундан анча юқори. Биз камида 20 миллион ўлим ҳолатини назарда тутяпмиз”, — деган Гебреесус.
Эслатиб ўтамиз, ЖССТ томонидан 2020 йил 30 январда коронавирус инфекцияси тарқалиши муносабати билан дастлаб фавқулодда ҳолат, ўша йил 11 март санасида эса пандемия эълон қилинган.
Изоҳ (0)